The show must go on

Tumerparpaartartoq Martin H. Zinck sivisuumik eqqarsareerluni nipilersornerup silarsuaanit tunuarallarniarluni aalajangerpoq.

- Ukiut qulit kingulliit nipilersornermik aallutaqarpunga nipilersoqatigiinnilu arlalinni ilaasortaallunga. Kisianni inummik uannut pingaarutilimmik tapersersortigilluakkannillu siorna annaasaqarnerma kingorna nipilersornermik soqutiginninnera appariartulersimavoq, taamaattumik nipilersorneq unitsikkallarniarlugu aalajangerpunga, Martin H. Zinck oqarpoq.

Martin H. Zinck Nanoommi ilaasortaanermi saniatigut nipilersoqatigiinniThornstonekkunni, Kishimami, Piand-El-imi, DDR-imi aamma Rikkami ilaasortaavoq.

Nipilersoqatigiinni bassertartup Ib Uldumip nipilersoqatigiinnit tunuarnerminut aalajangernini ilaquttaminik aallussinerulernissamik tunngaveqartoq nassuiaatigaa.

Nipilersoqatigiinni ilaasortat sinneri Christian K. Elsner, Frederik K. Elsner aamma Mads Røn uniinnarnissaminnik pilersaaruteqanngillat.

- Uninnerat ajuusaarutigaarput, kisianni uagut uninnissamik pilersaaruteqanngilagut, akerliganilli nipilersortartunit soqutiginnittunit saaffigineqallattaalereerpugut, Christian Elsner, nipilersoqatigiinni erinarsortartoq guitarertartorlu, oqarpoq.

Nanook CD-mik nutaamik aqqummersitseqammivoq taaguutilimmik Ai Ai.