Shotokan karate: Aqqaneq marluk qiterutaat qalipaatitaarput

Nuummi karate-rtartut peqatigiiffianni Nuuk Shotokan Karate-Do-mi aasaanerani sungiusarluartoqareersoq misilitsilttoqarpoq
Shotokan karate
Nuuk Shotokan Karate-do aasaanerani sungiusartoqarluarpoq Assi © : Nuuk Shotokan karate-Do
Allattoq Noah Mølgaard
septembarip 04-at 2020 05:35

Staycation sorpassuusinnaavoq.

Taakku ilaat tassaasinnaavoq illoqarfigisami timersoqatigiiffimmi pisoqarnerulernera.

Nuuk Shotokan Karate-Do-mi taama misigisimapput aasaanera sapaatip akunneranut sisamariarlutik sungiusartaramik. Maanna ima sungiusarsimatigilerput piginnaasat naliliisartunut takutinneqarsinnaalersimallutik.

- Misilitsitsisarneq naliginnaasumik decemberimi junimilu pisaraluarpoq, ukiormannali aasaq naallugu peqatigiiffipput ingerlavoq. Amerlasuut sulinngiffeqarnertik Nuummi atormassuk peqatigiiffimmi sungiusarnissamut piffissaqarluarsimavoq, Nuuk Shotokan Karate-do-mi siulersuisuni ilaasortaq Kasper Dyrberg oqarpoq, ilanngullugulu unnersiutigaa aasaanerani sungiusarnernut takkuttartut amerlarsimanerat.

Qalipaat alluinnarlugu

Misilitsinneq marlunngorneq septemberip aappaat pivoq misilitsittullu aqqaneq marluusut tamarmik qiterutiminni nutaamik qalipaatitaartinneqarput, tamannalu uppernarsaataavoq timersuumminni qaffariarnerannut.

Meeqqat arfineq marluk sungaartumik qiterutitaarput marluk qorsummik qiterutitaartut. Pingasullu ima sungiusarluarsimatigipput qaqortumiit toqqaannartumik aappaluartumik qalipaatilimmut qaffariarput. Karatertartut peqatigiiffianniit oqaluttuarput tamanna aatsaat pisartoq misilitsinnermi pitsaalluinnartumik takutitsisimagaanni.

Decemberimi misilitsittoqaqqittussaavoq taamanikkussamullu anguniagassat aalajangersorneqareerput.

- Anguniagassat tassaapput ajasseriaatsit nutaat, tukerseriaatsit nutaat aammalu aalariutsit arlariit, Kasper Dyrberg nalunaarpoq.

Taanna aamma erseqqissaavoq timersuutsik tukersinerinnaananilu ajassinerinnaanngitsoq.

- Karatertartuunermi pingaaruteqarluinnartut ilagaat ataqqinninneq eqqissisimanerlu taakkulu periutsit eqqortumik naammassinerattulli pingaaruteqartigipput, Kasper Dyrberg naggasiivoq.