Shell issittumi uuliasiorsinnaanerminik paasititsiniaavoq

Politikerit, avatangiisinik illersuiniaqatigiiffiit nunallu inoqqaavi Shellimit ukiuni kingullerni tallimani sunnerniarneqarsimapput.

Issittup imartaani isumannaatsumik uuliasiorsinnaanertik, Shellip paasitinniarsarisimavaa, uuliasiorsinnaalernissartik matumani neriuutigalugu.

Shellip maanna uuliasiorfiini uuliap qallorneqarsinnaasup annikilliartuinnarnera pissutaalluni uuliasiorsinnaalernissartik Shellimiut neriuutigaat.

Beringstrædet-mi Alaskap imartaani sumiiffinni assigiinngitsuni qulini uuliasiornissaq pillugu Shellip pilersaarutini USA-mi naalakkersuisunut saqqummiunniarpai.

Shellimi aqutsisut nunaqarfik Sivunga, Beringstrædet-p sineriaaniittoq, tikeraarsimavaat. Shellimi aqutsisut uuliasiornissamut pilersaarutitik  saqqummiussimavaat.

Uuliasiornissaq pillugu qillerinissat suliluunniit aallartinneqanngitsut, Shell, aviisi The New York Timesimi allaaserisap imaa naapertorlugu, 3,7 milliardit dollarinik, imaluunniit 20 milliardit koruunit missaat atorsimavaat.

Nappartat 27 milliardit missaat uuliamik Beringstrædetimeersumik immerneqarsinnaanissaat ilimagineqarpoq.

Tamaani uuliasiortoqalissagaluarpat piniagassat qimaatinneqarnissaat, tamaani najugallit aarleqqutigaat.

Shellip uuliasiorsinnaanissamut qinnuteqaataa præsident Barack Obamamut ajornartorsiutaasinnaassaaq, illuatungeriinnit kimigiiserfigineqarnini ajornartorsiutigilersinnaassagamiuk.

Shell Hollandimiut Tuluillu pigisaraat, uuliasiortitseqatigiillu katillutik arfineq-marluupput Nunatta imartaani uuliasiorniartut, Shellilu taakkununnga ilaavoq.