Shell Issittumi uuliasiorniarunnaartoq
Misileraalluni qillernerit inerneri pakatsinartut pissutigalugit Issittup imartaani qillerinerup taamaatiinnarneqarnissaanik aalajangertoqartoq, uuliasioqatigiiffik ullumi ataasinngornermi tusagassiorfinnut nalunaaruteqarluni allappoq.
Aammattaaq Issittumi qillernerit akisuupilussuuneri suliaqarfimmilu amerikamiut inatsisiliornerisa "unammillernartuuneri naatsorsuutigiumaatsuunerilu" Shellimit oqaatigineqarpoq.
AAMMA ATUARUK Alaskap avataani uuliasiorluni qillerinissaq akerliuffigineqartoq
Nutaarsiassaqartitsivik BBC naapertorlugu uuliasiorluni misissuinerit qillerinerillu uuliasioqatigiiffimmut 7 milliardit dollarsinik akeqarsimapput, tassalu 46 milliardit koruunit missaannik.
Shellip Alaskap avataani qilleriniarunnaarnera avatangiisinik illersuiniaqatigiiffiup Greenpeacep nuannaarutigaa "ajugaarujussuarnertullu" taallugu.
Greenpeacep tamatumunnga peqatigitillugu Issittup illersorneqarnissaanik ilungersuuteqarnini ingerlatiinnassagaa, tusagassiorfinnut nalunaarummi oqaatigineqarpoq.
- Ullumikkut ajugaanerput Issittumik illersuiniarnitsinnut pingaaruteqarluinnaraluartoq, Issittumi naalagaaffiit Issittup illersorneqarnerata inatsisitigut aalajangersaaviginissaanut kimigiiserfigiinnartariaqarpagut. Issittup imartaa inatsisiliorfigineqanngitsoq isiginngitsuusaarsinnaanngilarput. Issittup imartaa tamakkerlugu uuliasiorluni qillernerit inerteqqutigineqartariaqarput aalisarnermullu aqunneqanngitsumut illersorneqartariaqarluni, Greenpeacep Danmarkimi immikkoortortaqarfiani Issittumi sulianut akisussaasoq, Jon Burgwald, taama oqarpoq.
