Shell Issittumi uuliasiorluni qillereqqinnissaminut piareerpoq
Shell-ip umiarsuit qillerutit marluk atorniarpai, ilaatigut Nobel Discover, siullermik uuliasiorfiutileqatigiiffiup uuliaqarfik 2012-imi qilleriffigalugu aallartitani qilleriffigalugu naammassiniarpaa.
Aviisi Alasa Dispatch naapertorlugu Shell-ip naatsorsuutigaa qillerinerit nutaat ingerlatassat piffissami qilleriffiusinnaasuni arlaqartuni ingerlanneqarnissaat.
Aammattaaq isumannaallisaanermut piareersaatit nutaat atuutilissapput. Ajutoortoqassagaluarpat uuliasiorfiutileqatigiiffik ilaatigut aamma helikopterimik piareersimatitsiniarpoq, silaannaap mingutsinneqarneranut nutaanik malittarisassaqassaaq, uuliasiorfiutileqatigiiffillu umiarsuarmik qillerummik allamik aammattaaq attartorniarpoq,Polar Pioneer, Shell-ip umiarsuaataa qillerut Kulluk ilisimaneqartutut Alaskap kujammut kitaata tungaani Kodiak Islandip eqqaani ukioq manna ukiortaami Beringip imartaani anorersuarujussuarnerani ikkarlimmat.
Aammattaaq Shell-ip nutaamik pilersaarutaani allassimavoq uuliasiorfiutileqatigiiffiup Inupiami Alaskami illoqarfimmi Barrowimi uuliasiorfiutileqatigiiffimmi sulisunut inissiassaqarfimmik sanaartortinniagaa 75-iinnaagaluartunit maannakkut sulisartunut 200-nut amerlineqassasut.
Nutaamik qillerinerit aallartinneqassapput, naak Shell 2012-imi qillerinermini arlaqartunik ajornartorsiuteqarsimagaluartoq, pisoq ajornerpaaq tassaavoq Kullup ukiortaami ikkarlinnera.
Ajutoornerup tamatuma kingunerigaluarpaa Amerikami kongressip issittup imartaani qillerinermi sillimaniarnerup misissuiffigeqqissaarnissaanik piumasaqarneranik. Kisianni Shell-ip uuliasiorlutik qillerinissamut pilersaarutini tassa manna attatiinnarniarpaa.