Sheila Watt Cloutier nersornaasigassatut innersuunneqarpoq
Silap pissusaata allanngornerata kingunerisaanik avatangiisinut sunniutai salliutinnagit, inuilli inooriaasiannut sunniinera pingaanerutillugu, nunarsuarmioqatigiinnut paasisitsiniaasartoq, Sheila Watt-Cloutier, Nobelip eqqissinissaq pillugu nersornaasiuttagaanik Al Gore peqatigalugu nersornaaserneqartussatut aqagu toqqarneqariaannaapput.
Arnaq Akilinermiu pillugu Oline Inuusuttoq Olsen paasissutissiissaaq:
Sheila Watt Cloutier, nittartakkami silap pissusaata allanngornerata kingunerisaanik inuit namminerlu inooriaatsimi qanoq sunnerneqarnera pillugu oqalugiarnera you-tubemut ilineqarsimasoq tigulaariffigaarput.
Oqalugiarnermini inuit nunarsuuq qaarpiaani issittumi 150.000-inik sinneqartut nunanilu sisamat akornanni ittut oqaluttuarai.
Sheila Watt-Cloutier akilinermi Kuujjuarmi decembarip aappaanni 1953-imi inunngorpoq, inuunerminilu ukiuni qulini siullerni ilaquttani piniartukkormiuusut ilagalugit qimullutik piniagassanik malersuillutik inuupput.
Maanna silap pissusaata allanngornerata kingunerisaanik inooriaaserisimasani qanoq allanngorsimanerasoq pillugu nunarsuarmioqatigiinnut angalaarluni paasisitsiniaasarpoq.
Inuit pilersitaannik silap pissusaata allanngoriartornera oqariartuutigalugu.
Sheila Watt-Cloutier politikkikkut suliniarnini 1995-imi Canadami Inuit nunaminnik piginnittuunissartik anguniarlugu suliniaqatigiiffianni allatsinngorami aallartippaa, ukiorlu taanna Canadami ICC-p Præsidentiattut aamma qinerneqarpoq. 2002-imilu ICC-imi Præsidentitut qinerneqarpoq. Tassaniinnermini issittumi inuit nerisaasa avatagiisinik migutsinneqarnerup kingunerisaanik sunnerneqarneri pillugit nunarsuarmioqatigiinnut oqaaseqatartuulerpoq.
2005-imilu issittumi silap pissusaata allanngorneranik misissuereernerup kingorna, Sheila Watt-Cloutier piniartullu 62-it allat USA-p gassinik silamik kissatsikkiartortitsisunik aniasitsinerata kingunerisaannik, issittumi Inuit inuuniarnerannik innarliisimasutut Amerikami inuit pisinnaatitaaffiisa kommissioniannut unnerluutigaat, kingornalu unnerluussutaat itigartinneqarluni, itigartitsisoqaraluartorli oqariartuutaat tusarniarneqarput.
Maanna Amerikami præsidentimut tullersortaasimasoq Al Gore peqatigalugu, Nobelip eqqissinissaq pillugu nersornaasiuttagaanut innersuunneqarput.
Nunatsinni ICC-p præsidentia ukiorpassuarnilu suleqatigisarsimasaa, Aqqaluk Lynge, Sheila Watt Cloutierip toqqarneqarnissaanut neriuuteqarluarpoq.
-ICC-imiit neriulluartorujussuuvugut, Uani nersorneqarniartoq naggueqatitsinni nobelimik nersornaaserneqartussatut innersuussani siullerpaajungami. Nunap inoqqaavisa pisinnaatitaaffiinik suliniarnitsinnut sunniuteqartorujuussooq, ullaakkullu arfineq marlunut toqqaasoqarnerani naalarnissaagut, Aqqaluk Lynge oqarpoq.
