Sheila Watt-Cloutier FN-imit nersornaaserneqassaaq
Silap allanngoriartornerata issittumi kingunipiluinik qasusuilluni paasisitsiniaasimasutut Inuit Issittormiut Siunnersuisoqatigiivini ICC-mi præsidenteriusimasoq Sheila Watt-Cloutier Naalagaaffiit Peqatiinniit nersornaaserneqalerpoq.
Nobelip eqqisseqatigiinnissamik suliniuteqarsimasutut nersornaasiuttagaannut Sheila Watt-Cloutier ukiormanna innersuunneqartunut ilaavoq.
USA-p præsidentimut tullersortigisimasaa Al Gore, Boliviallu præsidentia Evo Morales innersuunneqartunut ilaapput, nersornaallu ukioq manna kingusinnerusukkut tunniunneqartussaavoq.
Inunnik imaluunniit inuiaqatigiinnik ineriartortitsinissamut suliniuteqarsimasumut Naalagaaffiit Peqatigiit nersornaasiuttagaat, Mahbub ul Haq-ip nersornaasiuttaagaanik taaneqartartoq, FN-ip generalsekretærianit Ban Ki-moon-imit tunniunneqarumaarpoq.