Sheila Watt-Cloutier, Akilinermi naggueqatigiit siuttuisa ilaat nersorniarneqarpoq
Taanna aviisip Canadami ukiuni kingullerni qulikkaartuni, Canadamiut pingaarnerit qulit ilaanniittutut taavaa. Sheila Watt-Cloutier Nunavimmi Kuujjuarmiuuvoq, ICC-milu siulittaasuusimalluni.
Sheila Canadami inuit pingaarnerpaat ilaattut isigineqarpoq, tassami taannaagami, Canadami silap pissusaa pillugu oqallinnermik inuppalaarnerulersitsisoq.. tassa oqallinnermi sikup qanoq annertutigisup aassimanera pineqarunnaarluni, tamassuma inunnut issittumi najugaqartunut qanoq sunniuteqarnera isiginiarneqalermat.
Taanna siulliulluni issittoq pillugu Canadami saqqummiussisarpoq, aamma USA-mi Naalagaaffinnilu Peqatigiinni nunarsuarmiunut erseqqissarpaa, naggueqatigiit Inuit issittumi inuummata, taakkulu silap pissusaata allanngoriartornerata kinguneranik inuunerminnik allanngortitsisariaqalermata.
Tassami Sheila Watt-Cloutierimut silap pissusaata allanngoriartornera ilisimatuussutsikkut paasisanik oqalunnerinnaanani, naggueqatigiit Inuit inuillu allat inuunerisimasaminnik kulturimillu ilisimaarisaminnik ingerlatsiinnarsinnaanerat pineqarmat.
