Sexolog ulapaarpoq

Ulrikka Holmip kinguaassiutinut ilisimatusartuunini, tassa sexolog-iunini nipituuliutigineq ajorpaa. Taamaattoq inuit assigiinngitsunik ajornartorsiutilippassuit Ulrikkamut ikioqqusarput.

Sexolog Ulrikka Holm nakorsanut arlaleriarluni sulianik ingerlatitseqqittarpoq, arlallillu tarnip pissusaanik ilisimasalimmik aamma pisariaqartitsisarlutik. Ulrikka Holmip sullitai ukiup ataatsip ingerlanerani amerliartuinnavissimapput.

Ulrikkap sullitaasa ilaat kinguaassiutitigut atornerlunneqarsimanertik aallaavigalugu ikiorneqartarput. Taamatullu atornerlunneqarsimaneq arlalippassuartigut kingunerluttitsisarpoq.

- Ilaat atoqateqarnissaminnut tunuarsimaartunngortarput, massa ilai naammatsiffeeruttuusillutik atoqateqartalersartut. Tassalu tamarmik kinguaassiutitigut atornerlunneqarsimaneri ajornartorsiutaasa sorlagigajuttarpaat, Ulrikka Holm KNR-mut taama oqaluttuarpoq.

Taamaammat Ulrikka Holmip sexologitut suli annertunerusumik ilinniaqqikkusuppoq, inuit kinguaassiutitigut atornerlunneqarsimasut pitsaanerusumik sullinnerusinnaaniassammagit.

- Inuit kinguaassiutitigut atornerlunneqarsimasut misigisamik assiganik misigisaqarsimasunik oqaloqateqarnissartik pisariaqartittarpaat, taamaasiornikkut misigissutsitik oqaasinngortissinnaaniassagamikkit. Taamaammat inuit atornerlunneqarsimasut ikiorserumallugit suli pikkorissarusuppunga, Ulrikka Holm taama oqarpoq, AlbaHus-imilu praktikkerusulluni.

AlbaHus tassaavoq inersimasut kinguaassiutitigut atornerlunneqarsimasut Københavnimi siunnersortiffittarfiat katsorsartittarfiallu.

Inatsisartut ukiaanerani katersornerisa nalaani inersimasut kinguaassiutitigut atornerlunneqarsimasut aamma katsorsarneqarsinnaanngortinneqarnissaat eqqartorneqarpoq.

- Kinguaassiutitigut atornerlunneqarsimasunik katsorsaasalernissamut iliuusissanik inatsisartut samminnilernerat sullitama arlallit assorsuaq nuannaarutigivaat, Ulrikka Holm oqarpoq.

Kinguaassiutitigulli atornerlunneqarsimasuinnaat kisimik Ulrikkamut saaffiginninneq ajorput. Aamma arnat masassinnaajunnaarsimasut angutillu tissattarnermikkut ajornartorsiutillik aamma ikioqqullutik saaffiginnittarput.

- Ajornartorsiutit ilai eqqarsaatinik aallaaveqartarput, tassami imminut tatiginissaq tamatigut pingaaruteqartarmat. Ilaasali nakorsamit ikiorneqarnissartik amigaatigiinnartarlugu, Ulrikka Holm taama oqaluttuarpoq.

Inuit sullittagai 21-niit 55-nut ukioqarput. Ikioqqusullu e-mail imaluunniit SMS atorlugit saaffiginnikkajuttarput. Maannali nammineq katsorsaavissaminik ininik pissarsisimavoq, ataasinngorneq januaarip qulingiluaat ammartussamik, inilumi sullissinissap suli pitsanngoriaqqinneranik kinguneqassajunnarsivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat