Sermitsiaq: Nujus uneriaannaavoq
Qaammat tulliuttoq, naalakkersuisuni ilaasortaasimasup Mikael Petersenip ingerlatsiviata Nujusip ingerlaqqissinnaanissaanut aalajangiisuulluaratarsinnaavoq, taama aviisimi Sermitsiami saqqummeqqarmersumi aallaaserisaqartoqarpoq.
Inuussutissalerinermik ingerlatsiviutimi Nujus-ip aningaasarsiornera annaanniarlugu Mikael Petersen maanna aningaasassarsiuleruttorpoq.
Ingerlatseqatigiiffik Mikael Petersenip 2004-mi pilersitseqataaffigisaa ukiortaariitsiartoq akilersuinerminik unitsitsivoq, aningaasanillu ikiorserneqanngikkuni akiliisinnaajunnaassaaq.
- Ingerlatsivik ingerlaqqissappat maannakkorpiaq 2 million koruuninik atorfissaqartitsivugut, Nujus-ip siulersuisuini ilaasortaq, pisortaasimasorlu Mikael Petersen Sermitsiami taama issuarneqarpoq.
Taamaattoq Nujusip aningaasanik qanoq amerlatigisunik akiligassaqarnera aningaasaliisussarsiornermilu isumaqatigiinniarnernut tunngasut Mikael Petersenip itinerusumik oqaaseqarfigerusunngikkai Sermitsiaq allappoq.
Nujusimi siulersuisuni siulittaasoq Hans Mathiassen siulittaasuunerminit tunuarniarluni nalunaarpoq
Ingerlatsiviup siunissaata aaqqiagiinngissutaanera tunuarnerminut tunngaviunerarlugu Hans Mathiassen oqarpoq Nujusimi pisortamik avataaneersumik atorfinitsitsinissamik kissaateqarsimanini, tamatumanilu ikinnerussuteqartutut inissisimanini tunuarniarnerminut tunngaviusut.
