Sermitsiaq AG-lu nunani allani naqiterneqartalissapput
Tusagassiuuteqarfiup Sermitsiaq.AGp siulersuisuinit taamatut aalajangiineq nunatsinni naqiterivimmut aningaasartuutit annertuallaalersimaneranik kinguneqartoq, tusagassiutinut nalunaarummi nassuiarneqarpoq. Nunattalu avataani naqiterisitsisalerneq miliuuninik arlalinnik sipaaruteqarnermik kinguneqassasoq naatsorsuutigineqarpoq.
- Maannakkut inissisimanerput eqqarsaatigalugu taamaaliunngikkutta akisussaassuseqanngitsutut pissusilersussaagut, tusagassiuuteqarfimmi pisortaq, Poul Krarup oqarpoq.
Tusagassiuuteqarfinni sipaarniarneq, Namminersorlutik Oqartussanillu siammarterinermut tapiisssutigineqartartut 2012-ip naanerani unitsinneqartussaanerat, pissutigalugit aviisit imarisaasa pitsaanerulernissaat anguniarlugu avaqqunneqarsinnaajunnaarsimavoq.
- Siunissami qanoq pisoqassanersoq nalugatsigu, taamatut iliuuseqarnissarput pisariaqavissorpoq, avatangiisitsinniillu qisuariaatit takutippaat iliuuserisariaqaligarput paasineqarluartoq. Minnerunngitsumik pisortat nittartakkamikkut allatigullu tusagassiuutitigut allagarsiisarnerulernerisa kingorna, Poul Krarup oqarpoq.
Aviisit kattuneqarnerisa kingorna, tusagassiuuteqarfik akisussaasutut aaqqissuisut ilanngullugit tusagassiortunik qulingiluanik sulisoqarpoq. Saniatigut ataatsimik assiliisartoqarpoq pingasunillu nutserisoqarluni. Aviisit kattunneqanngikkallarmata aviisini taakkunani marlunni tugasassiortut 18-it, ilinniartut marluk, assiliisartut nutserisullu atorfeqaraluarput.
Taakku Kalaallit Nunaanni tusagassiuutit atuarneqarnerpaasartut suliarisarpaat: aviisit marluk, sapaatip akunneranut saqqummertartoq ataaseq, Kalaallit Nunaanni nittartakkakkut nutaarsiassaqartitsivik, atuagassiaq Arnanut kiisalu timmisartumik angalasunut atuagassiaq Suluk.
