Nunarsuatsinni sermit, ukiut 20-t matuma siornanut sanilliullugit sukkanerusumik aakkiartorput.
Nunarsuarmi serminik nakkutilliisut ilisimatusarnerisa tamanna ersersippaat – taanna suliniaqatigiiffiuvoq, nunarsuarmi sumiiffinni assigiinngitsuni 30-t sinnerlugit amerlassusilinni, serminik misissueqqissaarfeqartoq.
Sermit, imaluunniit sermit iigartartut, 2005-imi agguaqatigiissillugu 60-70 centimeterinik saannerulerput naatsorsuinerillu ersersippaat aakkiartorneri sukkatsikkaluttuinnartut. Nunarsuarmi serminik nakkutilliisut siulittuutigaat 2100-mi sermit qaqqarsuarni Alpiniittut sisamaagaangata pingasut aallutik nungoreersimassasut. Sermit aakkiartornerat inunnut pingaaruteqartorujussuanngorsinnaasoq silaannaap aallanngoriartorneranik immikkut ilisimasalik Katrine Krog Andersen Danmarkimi Avatangiisinut Aqutsisoqarfimmeersoq oqarpoq.
- Sermit qaqqaniittut aallutik nunguppata tamanna inuit Himalayap eqqaani najugaqartut imeqarniarnerannut sunniutilerujussuussaaq, Katrine Krog Andersen oqarpoq.
Sermit nakkutiginerisigut nunarsuarmi silaannaap allanngoriartornera qanoq issanersoq eqqoriarneqarsinnaavoq.
- Sermit silaannaap allanngoriartorneranut aamma nittaalamut sialummullu malussarittorujussuupput. Sermit nunarsuaq tamakkerlugu aakkiartornerisa ersersippaat nunarsuarmi silaannaq kissatsikkiartortoq, Katrine Krog Andersen oqarpoq.
Katrine Krog Andersen maanna Parisimi ilisimatuut silaannaap allanngoriartorneranik sammisaqartut 500-t nalunaarusiaminnik inaarsaaneranni peqataavoq. Ilisimatuut silaannaap allanngoriartorneranik sammisaqartut ukiut tallimat matuma siornagut nalunaarusioramik maanna nalunaarusioqqilerput. Tamatumuuna silaannaap kissatsikkiartorneranut inuit pisooqataanerat nalornissutigineqanngilaq.
- Massakkut silaannaap kissatsikkiartornera ilisimalereerparput, tulliullugu naalakkersuinikkut iliuuseqartoqanngippat ukiut hunnorujut qaangiuppata silaannaap allanngoriartornera qanoq issanersoq sammineqartariaqarpoq, Katrine Krog Andersen naggasiivoq.