Ilisimatusartut: Qarmarsualiorluni immat qaffakkiartornerat pinngitsoortinneqarsinnaavoq
USA-mi ilisimatusarfissuit ilaanni Princeton Universitymi, Kinamilu Beijing Normal Universitymi ilisimatusaatigut suliniummi taama ilaatigut siunnersuusiortoqarpoq. DR.dk taama allaaserisaqarpoq.
Sermit iigartartut immamit sisamanik kissassusilimmit naqqanit aakkiartuaartinneqartarput. Imaq tarajoq, sermimit iminngortumit oqimaanneruvoq, sermimiillu iminngortup ataanut pisarluni.
Sermit iigartartut taamaaligaangat sukkanerusumik aalersarput, immallu qaffakkiartuaalersarlutik.
Sermiit iigartartut saavanni immap naqqani qarmarsualiortoqarnissaa, immikkut ilisimasallit taamaammat siunnersuutigaat. Immap tarajuusup kissarnerusullu, serminut iigartartunut taamaalinikkut anngussinnaajunnaarsinniarpaat.
Sikuiuitsoq Kujallermi sermip iigartartup Thwaitep sinerissamut ingerlaarnera, immikkut ilisimasallit qarasaasiat atorlugit misissorsimavaat. Sermeq iigartartoq Thwaite nunarsuarmi annerpaavoq.
Sermip iigartartup saavaani immap naqqani qarmarsualiorsinnaaneq ilisimatusaatigalugu suliarineqarsinnaavoq, immalli naqqani qarmarsualiorniarneq piviusorsiornerunngitsoq, Sebastian H. Mernildip, oqaatigaa. Taanna Naalagaaffiit Peqatigiit silap pissusia pillugu ataatsimiittartoqatigiinni ilaasortaavoq, silallu pissusiata allanngoriartornera pillugu aamma professoriulluni.
- Qarmarsuit taamaatttut iluaqutaassappata, sermit iigartartut nunarsuarmi tamakkerlugit qarmarsualiorfigineqartariaqassapput. CO2-mik aniatitsinerup annikillisarneqarnissaa uanga isumaqarpunga aqqutissaasoq, Sebastian H. Mernild, DR.dk-mut oqarpoq.
Immikkut ilisimasallit ilisimatusaatitik tusaqqusaaginnarlugit sermit iigartartut saavanni immap naqqani qarmarsualiorfigineqarnissaannut siunnersuuteqartut, Mernild isumaqarpoq.