Sermimit akunnittarfiliat takussaagaluttuinnarput
Aviisimi The Barents Observerimi oqaatigineqarpoq, nunani Barentshavimut sinerialinni sumiiffinni assigiinngitsuni qulingiluani apummik akunnittarfiliortoqartoq, allaammi apummik nunaqarfeeraliortoqartoq.
Silap novembarimi immikkut ittumik nillernerata kinguneranik apummit akunnittarfiliap siulliup inisimasussanni siulliit tikilluaqqusinnaanngoreerpai. Sverigip avannarpiaaniittoq akunnittarfik Jukkasjärvi Icehotel, sapaatit akunnerisa marluk matuma siornagulli ammarneqarpoq. Akunnittarfik 600 kvadratmeterinik annertussusilik, 60-inillu initaqartoq, sermimit sanaamik oqaluffittaqarpoq, sermimit sanaamik bareqarluni sermimillu sukalimmik sermimillu qullilersorsimasumik kusanarsaarluinnakkamillu isaariarsuaqarluni.
Norgip avannaani Kirkenesimi Altamilu aamma apummik akunnittarfiliortoqaleruttorpoq.
Aamma Saamit Nunaanni apummik akunnittarfiliat sisamat ukioru ammarniarneqarput. Ilaatigut sananeqassalluni Lainio Snow Village Hotel, 20-nik illuigartaqarnermi saniatigut, arfineq marlunnik sermimik sanaanik inerujussuartaqartussaq, kiisalu apummit sanaamik neriniartarfeqartussaq Europamilu annerpaamik sermimit sanaamik bareqartussaq.
Europami ukiuunerani sikunik qiperukkanik nunaqarfiliassaq annerpaaq, Finlandimi sisorariartarfimmi Levi-miissaaq. Nunaqarfissaq taaguuteqartussaq "Wonderworld of Ice", decembarip 17-ianni ammarneqartussaq, Kinami illorsualiat tusaamasat assilillugit sermimik qiperuiffigineqartussaavoq.
