Sermimik misissuinissaq kinguartittariaqarpoq

Qaammataasiamut Cryosatimut, nunarsuatsinni silaannaap allanngoriartorneranut ilisimatuut isumalluarnerat, sapaatip akunnerata naanerani kipiluttunarsivoq, qaammataasiarmi taanna Nunatta avannaatungaani sequmimmat. Qaammataasiaq taanna aallartinneqaqqammerlunilu nakkarpoq. Aviisi Danmarkimi ullormut saqqummersartoq Berlingske Tidende ullumi saqqummersoq taama allappoq.

Russit avataarsualiartitsisarfiannit qaammataasiaq allanngorlugu sanaaq, russit ss 19-imik qaammataasiaannik taaguuserlugu, aamma suliffeqarfissuaq qaammataasiamik sanasoq, suliffeqarfissuarnut nunanit allaneersunut utoqqatsissummik nassitsereersimasut, nutaarsiassaqartitsivik Interfax telegramikkut nalunaarpoq.

Danmarkimi avataarsualiartitsisarfik, Terma, utoqqatsissummut qujavoq. Taanna danskit suliffeqarfiussuat ullorissanut assiliissummik Cryosatimut tunisisimavoq, taakkulu assiliissutit qulakkeertussaasimavaat, qaammataasiap silaannarsuarmiinnermini iluamik sammiveqarnissaa.

Nunarsuup imaata sikua aamma sermip Qalasersuup eqqaaniittup issussusaat qaammataasiap ukiuni pingasuni sukumisumik uuttortartussaagaluarpai.

Peqataasulli puaatsoorujussuaannarput. Ingeniørit ilisimatuullu ukiuni arfinilinni asulersuaq sulisimassasut nalilerneqarpoq. Akiligassat 120 millioni euro, imaluunniit 1 milliardi koruuningajaat, Europami avataarsualiartitsisarfimmut ESA-mut, akiligassanik isumaginnittuusumut, tuttussanngorput.

- ESA qaammataasiamut allamut, CryoSat 2-mut immaqa, aningaasanik pissarsissagaluarpat, ilaaqqissinnaavugut, Danmarkimi avataarsualiartitsisarfimmi, Termami, attaveqarnermut pisortaq, Kasper Rasmussen, nutaarsiassaqartitsivimmut Ritzauimut oqarpoq.