Ullaakkut, ualikkut unnukkullu. Aamma unnuaanerani. Kommuneqarfik Sermersuumi kommunalbestyrelsip angerlarsimaffinni ikiorsiisarnerup annerutilernissaanut 2018-imut 2,5 millionit koruunit immikkoortippai.
Kommuni nittartakkamini taama allaaserisaqarpoq.
Aningaasat 2,5 millionit koruuniusut Nuummi sundhedsassistentinut marlunnut peqqinnissamullu ikiortimut kiisalu Tasiilami sundhedsassistentimut peqqinnissamullu ikiortimut atorneqassapput.
Periarfissat nutaat isumaginninnermut suliffeqarnermullu ataatsimiititaliami siulittaasup, Charlotte Ludvigsenip nuannaarutigai:
– Ulloq unnuarlu angerlarsimaffimmi ikiorteqarsinnaaneq uagutsinnut politikeriusunut toqqissisimanarpoq, soorunalimi aamma utoqqartatsinnut. Nuannaarutigivara utoqqartagut pitsaanerusumik atugaqartissinnaaleratsigit, ataatsimiititaliami siulittaasoq oqarpoq.
