Sermersuup ilaa aalertorsimasoq
Sermersuup ilaa 18 milliardit tonsit missaannik annertussusilik ullut pingasut ingerlaneranni aalertorsimasoq missiliorneqarpoq.
Sermersuup ilaa kiarujussuarnerata kingunerisaanik aalertorsimasoq, Islandimi nutaarsiassaqartitsiviit ilaat Icenews aamma USA-mi nutaarsiassaqartitsiviit ilaat CNN allapput.
Sermersuup ilaa 18 milliardit tonsit missaannik annertussusilik juulip 15-iata 17-iatalu akornanni aalertorsimasoq missiliorneqarpoq.
Sermersuaq pillugu paasissutissat
Nunatta 80 procentia sermersuarmik qalligaavoq.
Nunatsinni sermersuaq nunarsuarmi sermersuarni anginerpaanut tulliuvoq, Sikuiuitsoq Kujallermi sermersuaq anginerpaalluni.
Nunatsinni sermsersuaq nunami 1,7 millionit kvadratmeteritut annertutigisumiippoq 3,2 kilometerillu missaattut portutigaluni.
Nunatsinni sermersuaq 2,9 millionit kubikkilometerit missaattut annertussuseqarpoq.
Nunatsinni sermersuaq tamarmi aappat, nunarsuarmi imavissuit 7 meterit missaannik qaffassasut naatsorsorneqarpoq.
Tusarfiit: DMI aamma Geus
USA-mi Colorado Universityp ilisimatusaaviani nakkutilliivianilu ilisimatusartuunerup Ted Scambosip oqarnera naapertorlugu sermersuup ilaata aanneranit kuuttoq ima annertutigaaq, allaat USA-mi naalagaaffik Vest Virginia qarsussinnaallugu. Tassa kuuttoq 30,48- centimeteritut ititigivoq.
- Nunarsuarmi ukiuni kingullerni 40-ni agguaqatigiisillugu kiassuseq qiviassagaanni sermersuup ilaata sapaatit akunnerata siuliani aalertorsimanera qaqutigoortuuvoq, taanna oqarpoq.
Canadamiit isersarnernera naqitsinertuffillu peqqutaasut
Canadamiit isersarnera nunatta avannaani sermersuup aalertorsimaneranut peqqutaasoq, Ted Scambos nassuiaavoq.
Nunattalu missaani naqitsnertuffeqarnera sermersuup ilaata qaqutigoortumik aalertorsimaneranut aamma peqqutaaqataavoq.
- Taama pisoqarnera isumakuluutigeqaara, USA-mi University of Texasimi ilisimatusartoq maannalu nunatsinniittoq Kutalmis Saylam CNN-imut oqarpoq.
Ilisimatusartut sermersuup ilaata aalertorsimaneranik arajutsisaqarsimanngitsut taama pisoqarnera ernummatigaat.
Sermersuup ilaata aalertorsimanera nunarsuarmi imavissuit qaffannerannik aamma kinguneqarpoq.
Nunatta ilaani aatsaat taama kiatsigisimasoq
Nunatta kangisissuani siorna juulimi aatsaat taama kiatsiginera peqqutaalluni sermersuup ilaa aalertorsimasoq aamma paasineqarpoq.
Siorna juulip naanerani naqitsinertuffeqarnerani nunatta kangisissuani 19,8 gradinik kiammat tamaani aatsaat taama kiatsigisoq uuttortarneqarpoq.
Sermersuaq nunatsinni juunimiit aggustip tungaanut kiatseruttornerani aakkiartukkajuppoq.
