Sermersuumi ukiumoortumik naatsorsuutit paatsiveqanngillat
Innuttaasut akiligassaannut tunngassuteqartut aamma 2009-mi 2010-milu aningaasartuutit nalunaarsorneqarnerat pingaarnertut oqaaseqaammi taaneqarput.
Kukkunersiuisut Deloittekkut oqaaseqaataanni tamanna atuarneqarsinnaavoq:
Bankimi uninngasuutit, aningaasarsiat uninngasuutillu nikerarneri pissutaallutik suli nalorninartoqartoq, kukkunersiuisut oqaatigaat.
Naatsorsuutit 2009-moortut naammassineqanngitsut missingersuutit ingerlaavartumik sliarinissaannut sunniuteqarsinnaapput:
- Naatsorsuutit suli naammassineqarsimanngippata, ukiullu naatsorsuiffiusut akornanni nalunaarsuinerit naammassineqanngippata missingersuutit ingerlaavartumik nangitsinneqarnissaat nalorninartoqarsinnaapput. Oqaaseqaammi tamanna atuarneqarsinnaavoq.
Oqaaseqaat kommunalbestyrelsip juunip 15-iani ataatsimiinneranit imaqarniliamut ilanngullugu kommunip nittartagaanut qanittukkut saqqummersinneqarpoq.
Missingersuutit sumut killiffiannik qaammatikkaartumik paasitinneqartarnissani, borgmesterip Asii Chemnitz Narupip ataatsimiinnermi piumasaraa.
Naatsorsuutit killiffiannik ataavartumik nalunaarsuinermi ileqqorisassaqannginnera pissutigalugu naatsorsuutit kommunit kattussuunneqarnerisa kingornagut naatsorsuutit pissusissamisoorunnaarsimapput.
Kommunimi pisortat pingasut kommunit kattussuunneqarnerisa kingorna soraarsimapput, soorlu aamma ingerlatsivinni aqutsisut taarseraannerujussuat aamma pissutaatinneqartoq.
- Sulisut taarseraannerujussuat sullissinermut sunniuteqarnerlussimavoq, Kommuneqarfik Sermersuumi pisortaanerugallartoq Stine Johansen oqarpoq.
Naatsorsuutit 2009-moortut kukkunersiuisunit Deloittekkunnit misissorneqarnissaat, aningaasaqarnermut ataatsimiititaliap januaarimi aalajangerpaa, naatsorsuutillu nutaat aggustip 17-iani saqqummiunneqassallutik.
