Ilaqutariinnut meerartalinnut najugaqarfik katsorsaaviutigisoq nutaaq
Ilaqutariinnut katsorsaanermik neqeroorut nutaaq, Nuummi inissiarsuarni nutarterneqaqqammersuniittussaq, Kommuneqarfik Sermersuup ullaap tungaani ammaanersiussavaa.
- Katsorsartinnissamik neqeroorutaavoq immikkuullarissoq, ilaqutarinnut meeqqaminnik isumassuisinnaanermik ajornartorsiuteqartunut neqeroorutigineqartoq, kommuni Kongevejimi inissiarsuarnik C-mik aamma D-mik pigisaqalersimasoq tusagassiorfinnut nalunaaruteqarluni taama allappoq.
Katsorsaanermik aaqqissuussinermut tunngaviusoq tassaavoq avatangiisit imigassamik hashimillu atuiffiunngilluinnartut pilersinneqarnissaat. Ilaqutariit taamaattunik avatangiiseqarnissamik kissaateqarnerat piumasaqaatit pingaarnersaraat.
Ilaqutariit inuunermik nutaamik pitsaanerusumillu inuuneqalerumallutik ilungersornerminni imminnut tapersersoqatigiittassapput.
Katsorsartissamik neqeroorut nalinginnaasumik ukiunik marlunnik sivisussuseqassaaq kommunimit nalilerneqarmat, allanngortitsineq ineriartornerlu piffissamik pisariaqartitsisut aamma periutsit ileqqutoqqallu sapaatit-akunnerisa arlalialunnguit imaluunniit qaammatialuit iluanni allanngortinneqarsinnaanngitsut.
- Uagut kommunitsinni meeqqanik inissiinerit pillugit kisitsisit qaffariartuinnarnerat takusimavarput. Tamanna naammaginanngilaq. Taamaattumik kommunalbestyrelsi isumaqatigiilluni taakkua amerliartuinnarnerat allanngortinniarlugu aalajangiivoq, borgmester Asii Chemnitz Narup taama oqarpoq, nangillunilu:
- Neriuppunga meeqqat amerlasuut allami taama periarfissanngitsut ilaquttatik najorlugit toqqissisimasumik Ivaami peroriartussasut.