Sermersuarmi kaffillerput
Qillerinermi ataqatigiissaarisoq, aamma Niels Bohrip Institutiani lektoriusoq, Jørgen Peder Steffensen, taama oqaluttuarpoq. Taanna aamma oqarpoq nunarsuarmi angusat annersaat Kalaallit Nunaata ullumikkut angugaa.
- Misigisaq nuanneqaaq. Tassa sermimik silallu pissusaanik ilisimatuut Københavnimiittut Sermersuarmi sisamariarlutik qillerereerput, uagullu marluk peqataaffigaavut. Immaqa pingaakujunniarnerugaluarpoq, kisianni tassa Københavnimeersut ikittuinnannguuvugut Sermersuarmi arfinileriarlutik qillerisimasut, oqarsinnaavugullu tamanna nunarsuarmi angusat annersarigaat, Jørgen Peder Steffensen oqarpoq.
Ilanngullugu Jørgen Peder Steffensenip ullumikkut ulloq Sermersuup qeqqani sermersiuunut nalliuttorsiorfiuvoq oqaatigaa, nangillunilu:
- Sermersuarmi sulineq oqitsuinnaanngilaq, ulorianartorujussuuvoq. Pituutarsuaq kittorarsinnaavoq, qillerulluunniit nakkaallugu, allanilluunniit pisoqarsinnaavoq. Taamalu pisoqaraluarpat asulersuaq aningaasartuuteqassaagut - taamaammat ullumikkut ulloq pingaaqaaq, aningaasaliisimasunummi oqarsinnaanngorpugut: - Iluatsipparput!
Jørgen Peder Steffensen nangilluni oqaluttuarpoq maanna timmisartumik NEEM-imukartoqartoq. Tusagassiortut allallu tikeraartut tassunga ilaapput.
- Sermimi tassa kaffisoqatigissavaatigut. NEEM-ip misissuiffiata eqqaani 16-it missaannik maanna issippoq, allaaqqillunilu anoreqarpianngilaq, taamaammat nuannissaqaaq, Jørgen Peder Steffensen oqarpoq.
NEEM-imi qillerinermi anguniarneqarpoq Sermersuup isertugaatai paasisaqarfiginiarneqassasut. Tassa silap pissusaa Kalaallit Nunaanni kingullermik kiammat qanoq issimanersoq.
- Ullumikkut naatsorsuinerit tamarmik ersersippaat sila kiannerusoq ornikkipput, tassalu imaappoq ukiut 100-t ingerlaneranni ukiut 130.000-it matuma siornagut pissutsit nalaatissagigut. Taamaattumik pingaaruteqarluinnartoq ilisimassallugu sermersuaq nungujartornersoq imaluunniit nunarsuup kissakkiartornerani ataannassanersoq, Jørgen Peder Steffensen naggasiivoq.
Sermimerngit qillikkameersut maanna mikisunnguakkuutaarlugit pilattorneqarput, uuttortarneqarlutik misissoqqissaarneqarlutillu, NEEM-illu ilisimatusarfia aggustip 18-ianni matuppat ilisimatusartut amerlaqisut angerlassallutik kisitsisillu misissuataarlugit inerniliisarlutillu.
