Sermersuaq aakkiartortoq takornariat alutorsaatigaat

- Angalanerput ajasoornarluinnarpoq, taama oqartariaqarpunga. Nunatsinnit aallartinnata suut takornariassanerlugit piareersareeraluarlugu piviusoq nammineq tikillugu isigalugu malugalugulu tupinnarluinnarpoq killitsinnarlunilu, angut takornariaq oqarpoq, allalu arnaq aamma takusaminik nuannarinnilluinnarpoq.

- Iluatalluinnarpunga, nuanneqaaq, pinngortitarsuaq asseqanngitsoq najugarsi takullugu tupinnaqaaq, oqarpoq.

- Iluliarsuit nammineq isinik takulerlugit misiginarpoq, qanoq pingaaruteqartigisoq pinngortitarsuup paarinissaa, takornariaq alla Tysklandimeersoq, takornariartaammi Eslemi ilaasoq oqarpoq.

Thorvald Jensen, Ilulissat kangianut sermersuup iigartarfianut takornariarnermi skipperiuvoq , ukiullu 19-ssaat takornariartitsisartuulluni.

- Ila immaqa iluliarsuarnik tassa takussaavissaagut, maluginiarparami ukiut tamaasa Ilulissat kangianit sermit aniasut milligaluttuinnartut. Taamani iluliarsuaqarallarmat, maniitsorsuit, iluliarsuillu imaaliallaannaq kaajallatassaanatillugu akulloqqutassaanngitsut takusarpagut. Ullumikkulli iluliusaannaapput, iluliaaraallutik sikuullutillu seqummakut. Taamanikkut angallammik sanioqqunnissaalluunniit pissanganartarpoq, eqqaamasakkalu naapertorlugit ukioq 2000-imiilli sermersuarmit aniasut suujunnaangajapput, maannalu aniatitai taamanikkutut annertutigigunaraluarlutik seqummakooqaat.

- Ullumikkut imaani takuneqarsinnaasut soorunami siornatigut ilulissanik sikunillu takusimanngisaannartunut tupinnarput, kisianni uagutsinnut ukiorpassuarni Kalaallit Nunaanniissimasunut mikingaarmata annilaarnaannarpulluunniit, skipper Thorvald Jensen oqarpoq.