Sermersooq tusarniaanermut akissuteqarnianngilaq

Kommuneqarfik Sermersuumi Isumaginninnermut, Suliffeqarnermut Inuussutissarsiornermullu Ataatsimiititami siulittaasoq Inuit Ataqatigiinneersoq Malene Lynge oqarpoq, akinissamut piffissaliussaq sivikippallaarujussuarmat akissuteqarniarnatik.
 
- Ataatsimiititaliatta kommunalbestyrelsellu una pillugu ataatsimiisinnissaannut ullunik arfineq-pingasunik piffissaliineq sivikippallaarujussuarpoq, piffissaqanngilagut, Malene Lynge erseqqissaavoq.
 
Malene Lynge aamma oqarpoq tusarniaaneq politikkertaqarmat allaffissornikkut akineqaannarsinnaanngitsoq, taamaattumik kommunalbestyrelsemi ataatsimiititalianilu ilaasortanit oqaluuserineqaqqaartariaqartoq.
 
Nunatsinni suliniutini angisuuni illuliortiternernik sanaartornernillu suliassat pillugit Inatsisartut inatsisaata, suliniutinut angisuunut inatsimmik aamma taaneqartartup, Inuussutissarsiornermut Aatsitassaqarnermut Suliffeqarnermullu Naalakkersuisoqarfiup ullut arfineq-pingasut atorlugit tusarniaassutigaa.
 
Suliniutinut angisuunut inatsisip siunertaraa nunatsinni aningaasaqarnikkut ineriartornermut immikkut ittumik pingaarutilittut suliniutini angisuuni aningaasaliinissamut piviusunngortitsinissamullu siuarsaanissaq, innuttaasut soqutigisaat mianeralugit.
 
Nunanik allamiunik killeqarfimmillu nakkutilliineq naalagaaffimmi Udlændingestyrelsip, tassalu nunanit allamiunut aqutsisoqarfiup oqartussaaffigaa, tusarniaassut akuerineqassappat allamiut najugaqarnermut sulinermullu akuersissutisisinnaanerat pillugu nunatsinnut inatsisitut ilusilikkamik najoqqutassiamik pilersitsisoqassaaq. Najoqqutassiaq nunatsinnut atuuttutut allamiunut inatsisaasumi malittarisassiami ilaasussatut atuutissaaq.
 
Malene Lynge aperaarput suliniummut peqataanissaq pingaarnerunnginnersoq, piffissaliussaq qanorluunnit sivisussusilerneqaraluarpat, imalu akivoq:
 
- Peqqissaarullugu suliarineqanngikkuni iluamik suliarineqarsinnaanngilaq, qanorluunnit akissuteqarniaannarluta akissuteqarsinnaanngilagut. Taamaattumik allatut ajornartumik taama iliuuseqarniarluta aalajangiinnarpugut, allamik periarfissaqannginnatta.
 
Nunanut allamiunut inatsisip allanngortinneqarnissaannut tunngasoq, ilaatigut nunatsinnut atuuttussaq, Folketingip aamma Inatsisartut marlunngorpat oqaluuserissavaat.