Sermersiooq rapperluni ajugaavoq

Sermersuarmi qillerineq rappernerlu. Taakku ataqatigiippallaangitsutut immaqa isigineqarsinnaapput, kisianni tassa hollandimiu, ilisimatusarfimmi ph.d-mut ilinniarnertooq, Christo Buizert, ilisimatusarnermut atatillugu unammisitsinermi ajugaarusulluni taamaaliorpoq.

Unammisitsinerli sumut tunngassuteqarnersoq paatsoorsimavaa. Unammisitsineq taaguuteqarpoq ph.d. slam-imik, Christo Buizertili isumaqarsimavoq - poetry slam assigalugu - nipilersoriaaseq rapimik taaneqartartoq pineqartoq. Kisiannili tassa unammisitsinermi pineqarpoq ilisimatusaatigineqartup minutsit pingasut atorlugit saqqummiunneqarnera, ilisimatuussutsikkut aviisimi Ingeniørenimi tamanna allaaserineqarpoq.

Christo Buizertip rapi pillugu isumassarsiani taamaatiinnarniarlugu eqqarsalersimagaluarpoq, kisiannili Københavnimi Sila Sikulu pillugu ilisimatusarfimmi ilinniartoqataasa taanna attatiinnaqqullugu akuersitissimavaat. Ph. dinngorniartoq 30-nik ukiulik Nunatta sermersuani sermimik qillerinermi peqataavoq.

Taamaalillunilu unammisitsineq, Yngre fagligt Forumimit ingerlanneqartoq, ilinniartoqatiminit allanit 19-init peqataaffigineqartoq, ajugaaffigaa. Akissarsiaritinneqarpoq atuagarsiutissat 1.000 koruunit.

Siku pillugu raperluni nipilersuusiani qarasaasiakkut maanna suliaraa, kingornatigut internetimi YouTube-imut saqqummersinneqarsinnaaqqullugu.