Sermerooq aamma taama aakkiartortiginngilaq
Nunarsuarmi nunap assiliortartut ataqqineqarnersaasa ilaanni, Time Atlas of The World-imi, aaqqissuisut kanngusuusaartussanngorunarput, Kalaallit Nunaanni sermip 15 procentiata peerussisimasutut naliliisimanertik pillugu issittumi ilisimasassarsiortartuniit isornartorsiorneqarujussuareernermik kingorna.
Nunap assinga nutartigaq sapaatip-akunnerani kingullermi saqqummerpoq, kisiannili ajortoqarpoq, taama oqarput Tuluit Nunaanni Scott Polar Research Institute-imi ilisimatuut.
Aap sermeq tiffarsimavoq, kisianni taama ingasatsigisumiunngitsoq.
- Tamanna ilisimasagut naapertorlugit oqaatigaarput, ilisimatusarneq pillugu atuagassiami saqqummersinneqarsimasumi oqaatigineqartoq illersorniarnagu, ilisimatuut The Times-imut allagaqarlutik oqarput.
Nunarsuatta kissakkiartorneranik pissuteqartumik kingunerisinnaasai pillugit misissuisarnerni ilisimatuut ilisimatusarfinneersut uppernarsaaniarlutik annertuumik suliaqarsimasut, BBC allappoq.
- Kalaallit Nunaannik qaammataasaniit assilisat kingullerpaat ersarissumik takutippaat, sermeq aanngisaannartoq tamaaniittoq, sulilu serminik iigartartorpassuaqartoq, naak nunap assingani Times-imeersumi nunat nutaat puttussuussimasut takuneqarsinnaagaluartut.
Saqqummersitsisarfiup Harper Collins-ip, The Times-ip nunap assiliaanik saqqummersitsisartup, nalunaarutigaa, Kalaallit Nunaata assingani paasissutissat USA-mi pisortatigoortumik Issittoq pillugu Ilisimatusarfimmiit tunngaveqartut, taamaattumillu nunap assingani, 1.300 koruuninik akeqartumi, paasissutissat attatiinnaritik.