Sermeqarfiit aakkiartornerat sukkaqaaq
1980-imiit sermeqarfiit 30-t nunarsuatsinni sumiiffinni assigiinngitsuneersut malinnaavigineqarsimapput, nalunaarsuinerillu ersersippaat sermit aakkiartornerat ukiuni kingullerni marlunni pingasuniluunniit sukkatsissimaqisoq.
Sermeqarfiit malinnaavigineqartut Sikuiuitsumi Kujallermiipput, Aasiamiillutik, Europamiillutik Amerikamilu Qiterlermiillutik.
Sermeqarfiit milliartornerpaat ilagaat Norgimiittoq Breidalblikk-ip sermia. Sermeq taanna 2006-ip ingerlanerani meterinik pingasunik saannerulersimavoq, naak 2005-imi ”taamaallaat” 30 centimeterinik saannerulersimagaluarluni.
Sermit aakkiartornerat Himalaya-mut kingunerlorujussuarsinnaavoq, tassami tamaani inuit milliardit affaanik amerlassusillit serminit aakkiartortunit imeqartinneqarmata. Nunami tamaani sermit qaffasissumiittut aakkiartornerat ullumikkutut ingerlaannassappat, ukiut qulikkaartut arlaqanngitsut qaangiuppata sermit aallutik nunguttussaapput.