Sermeq 2040-mi tamarmi aarataannaavoq

Qalasersuup nalaani sermeq aakkiartorpoq. Taama mianersoqqussuteqarput Amerikamiut ilisimatusartut nalunaarusiaminni ullumi saqqummiunneqartumi.

Qaammataasanit assilisat ersersippaat ukiut kingulliit 30-t ingerlaneranni sermeq 2 millioni kvadratkilometerisut annertussusilinik aassimasoq.

Gas-inik silaannarmik kissakkiartortitsisunik aniatitsineq nunarsuarmi massakkutut ingerlaannassappat, taava 2040-mi Nunatta, Canadap, Alaskap, Sibiriallu avannamut sianeriaanni sikuerutereersimassasoq ilisimatusartut oqaatigaat:

Tassa Amerikami Colorado-mi ilisimatuut qarasaasiat nutaaliaalluinnartut atorlugit paasisimavaat, nunat Qalasersuarmut sammisut sineriaat aasakkut annikitsuinnarmik sikoqartalissasut.

Ilisimatuut naatsorsuinerat malillugu Qalasersuarmi sermeq 2025-p tungaanut aalaakkaasumik annertusseqassaaq, tamatumali kingorna milliartornera sukkatsikkaluttuinnalissaaq. Tamatumunnga patsisaavoq ukiut 20-t qaangiuppata sermeq pilertarnerminit sukkanerusumik aakkiartulissammat, taama oqaluttuarpoq DMI-mi silasiortoq Jesper Theilgård.

- Oqartoqarsinnaavoq oqimaaqatigiinneqartoq, tassa sermeq ukiukkut pilertartoq aasakkullu aattartoq oqimaaqatigiipput. Piffissalli ilaani oqimaaqatigiinneq taanna allanngussaaq, tassa ukiukkut siku pilertartoq minnerulerpat aasakkullu sila kiannerusalerpat sikup aakkiartornera sukkanerulissaaq, Jesper Theilgård oqarpoq.

Ilisimatusartut oqaatigaat inuit pilersitaannik silaannaap kissatsikkiartornera pisooqataasoq.

Maannami takusinnaalereerpaat sermip ilarujussua aareersimasoq. Tamannalu Jesper Theilgårdip tupigusuutiginngilaa.

- Tamanna tupinnartoqanngilaq tassami seqernup qinngornera sermimut tukkaangami utersaartarpoq, qinngornerali immamut tukkaangami imaq kissarnerulersittarpaa taamalu silaannaap kissatsikkiartorneranut sunniuteqaqataalerluni.

- Uanga oqartarpunga ernutaqqiutivut aasakkut Qalasersualiarsinnaalerumaartut, Jesper Theilgård oqarpoq.