Serbiamiut sisamat katillugit ukiut 58-it parnaarussassanngortinneqartut

Ukiut 20-t parnaarussassanngortitaaneq. Taama ullumi pineqaatissinneqarput Serbiamiut sisamat sakkulersorumatuunut ilaasortat, Bosniami 1995-imi sorsunnermi pinerluutiminnut atatillugu. Taakkua Serbiamiut sisamat Bosniamiunik musliminik arfinilinnik Trepenica-mi eqqaassitillugit filmiliarineqarsimapput, tamanna pivoq sorsunnersuup siulliup kingornatigut Europa-mi inuinnarnik toqoraanermi annerpaami.

Serbiamiut taakkua sisamat tusaamanerlugaaqisunut Skorpioninut ilaasortaapput, taakkua Trepenica-mi musliminik angutinik nukappiaqqanillu 8.000-nik, Bosnien-Herzegovina-mi 1992-imit 1995-imut sorsunnerup naalernerani toqoraanermut peqataasimapput.

Sorsunnersuup siulliup kingornatigut aatsaat taama amerlatigisunik inuiannik toqoraanermut atatillugu pillaagaasoqanngingajassimavoq.

Serbiamiut taakkua sisamat pillarneqarsinnaalerput Bosniamiunut musliminut arfinilinnut ajortuliaat videuliarineqarsimammat.

Videuliami Serbiamiut taakkua sisamat toqutassatik tunuiniit aallaallugit kussiamut nakkartinnginnerini nikanarsarlugit oqaluttut tusaaneqarsinnaapput.

Videuliap amiilaarnartup allaat Serbiamiut Jugoslaviaasimasumi sorsunnermi pisimasunut annilaartissimavaat. Tassa taama amiilaarnartigisumik toqoraasoqartarsimanissaa ilimagisimanngikkaluaramikku.

Serbiamiut sisamat sorsunnermi ajortuliatik pillugit katillugit ukiuni 58-ini parnaarussassanngortinneqarput.