Serbiami oqartussat pisortatigoortumik utoqqatserput
Srebrenicami toqoraanerit Europami sorsunnersuup kingulliup kingorna aatsaat taama ingasatsigisumik inuiannik nungusaasoqarneranik taaneqartarput.
Toqoraanermi eqqugaasut misiginneqatigineqarput, aalajangersakkamilu Serbiap inatsisartuini akuersissutigineqartumi ilaatigut oqaatigineqarpoq toqoraanerit pinngitsoortinneqarnissaannut sukumiisumik iliuuseqartoqarsimanngitsoq. Inuiannilli toqoraasoqarsimanerannik Srebrenicami pisimasut taaneqarsinnaanersut inatsisartut isumaqatigiinngissutigaat. Danmarkip Radioata nittartagaani tamanna atuarneqarsinnaavoq.
Angutit nukappiaqqallu muslimit 8000-it missaat Bosniami Serberit sakkutuuinit 1995-imi toqorarneqarput, sakkutuut naalagaat Ratko Mladic siuttoralugu. Sakkutuut naalagaat taanna suli tigusarineqanngilaq.
Srebrenicamili toqorarneqartut qanigisaat utoqqatserneq annerusumik qisuariarfiginngilaat:
- Uagutsinnut soqutiginaateqanngilaq, inuiannik toqoraasoqarsimanera ilaatinneqangilaq. Utoqqatsissut inatsisartut akuersaarsimasariaqanngikkaluarpaat, Srebrenicami arnat peqatigiiffianni siulittaasoq Hajra Catic oqarpoq.
