Serbiami inatsisartunut qinersineq pissanganartoq

Serbiami inatsisartunut ullumi qinersineqarpoq. Partiit qinigassanngortittut imminnut akerleriittut sorliit ajugaanissaat pissanngatigineqaqaaq. Europamut illersuisut imaluunniit nunap immikkorluinnaq ingerlaannarnissaanik illersuisut.

Qinersineq aallartimmat nalunaaquttap akunnerini siullerni taasiartukaasoqarluarsimavoq, maluginiarneqarporlu innuttaasut nunamik siunissaanut aalajangeeqataarusussuseqarnerat.

Inuit qinersisinnaasutut 6,6 millionit allattorsimaffimmiipput, taakkulu inatsisartuni inissat 250-t kikkunnik inuttaqalernissaat aalajangerniartussaavaat.

Inatsisartunngortussat Kosovo naliliiffigisussaavaattaaq. Serbiami nunap immikkoortua taanna Naalagaaffiit Peqatigiiffiannit 1999-imi aqunneqalerpoq, Serbiamullu ilaaleqqissanersoq naalagaaffittulluunniit immikkuulissanersoq inatsisartussat eqqartugassaraat.

Serbiamiut nunamik EU-mi ilaanani immikkoortuaannarnissaanik illersuisut, Kosovop immikkut naalagaaffinngornissaa akerlerilluinnarpaat.

Serbiami nunap immikkoortuini 1990-ikkunnili avissaartuutilersimaneq, EU-mit naammagineqanngeqaaq, pissutaanerulluni general Ratko Mladicip sorsunnermi pinerluuteqarsimasutut Serbiamit tunniunneqarusunnginnera.