Serbia pinerluuteqarsimasutut pisuutinneqarpoq

Bosniami illoqarfimmi Srebrenicami 1995-imi inuppassuarnik ilumut toqoraasoqarsimasoq paasineqarpoq aalajangiunneqarlunilu. Jugoslaviaasimasumi sorsunnermi pinerluuteqarsimaneq pillugu Naalagaaffiit Peqatigiit Haagimi ullumi ataatsimiinneranni tamanna aalajangiunneqarpoq.

Bosniami naalagaaffiup inuisa 1990-ikkut ingerlaneranni imminnut sorsuunneranni Serbia pinerluuteqarsimasutut Bosniap pisuutippaa.

Inuiannik uumissuinissamik kajumissaarisimasutut serbiamiunillu Bosniamit kingoqqisunik sakkulersuisimasutut, kiisalu kroatiamiunik musliminillu Bosniami najugalinnik toqoraasimasutut serberit pisuutinneqarput.

Serbiali imminutillersorpoq, oqarluni, Bosniami sorsunneq innuttaasut akornanni pisimasoq.

Ikinnerpaamik 100.000 1992-imit 1995-ip tungaanut toqutaapput, Serbialu milliardi koruunerpassuarnik taarsiivigineqarnissaminik piumasaqariaannaavoq.

Nutaarsiassaqartitsivik BBC naapertorlugu, eqqartuussinerup naammassinngilaatsiarnerani, Srebrenicami 1995-imi toqoraanersuarmi toqutaasut ilaqutaat qanigisaallu sorsunnermi pinerluuteqarsimasunut Haagimi eqqartuussivissuup silataani katersuussimapput. Eqqartuussinermili tassa aalajangiunneqarpoq, inuppassuarnik taamani ilumut toqoraasoqarsimasoq.