Seqernup tamakkerluni pulanera timmisartumiit isiginnaarniarpaat

Ullumikkumiit sapaatip akunneri pingasut qaangiuppata – tallimanngornermi aggustip aallaqqaataanni – seqernup tamakkerluni pulanera Issittumi takuneqarsinnaassaaq.
Allattoq Elisa Isaksen
juulip 11-at 2008 17:04

Seqernup tamakkerluni pulanera nunatsinni Qaanaap avannaani takuneqarsinnaassaaq, Norgimiullu Svalbardimi qeqertani avannarlerni kangillerni takusinnaassavaat.

Qeqertani tamaani pujunngikkaangami qulisimanerusarmat, Norgimiut ulloriarsiuut seqernup tamakkerluni pulanera takunngitsoorumanagu timmisartumik SAS-imut attartugassarsiorsimapput, tassami Norskit ukiut 118-it matuma siornagulli seqernup tamakkerluni pulanerata takunissaa periarfissarisimavaat.

Seqernup tamakkerluni pulanera minutsinik marlunnik sekundinillu 14-inik sivisussuseqassaaq. Tamaanili timmisartumit qaammatip seqinermik assiinera minutsini marlunni sekundinilu 45-ni isiginnaarneqarsinnaassaaq. Piffissami tamatumani timmisartumut ilaasut seqernup tamakkerluni pulanermini qaamarnga ullorissallu isiginnaarsinnaassavaat.

Seqernup tamakkerluni pulanera Nunatsinniit takuneqarsinnaanera ulloriarsiuunit umiarsuarmullu takornariartaammut ilaasunit takuniarneqarniarpoq. Taakkumi Qaanaaliarniarput pinngortitamilu isiginnaagassaq qaqutigoortoq misigerusunneqarpoq.

Nunatta sinnerani seqernup pulanera tamakkiisuunngikkaluamik aamma takuneqarsinnaassaaq, soorlu seqernup pulanerata 60 procentia Nuummi takuneqarsinnaassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq