Igaliku seqernup anorillu nukinganit innaallagiaqalissaaq
Seqernup kissaanit nukiliuutit, innaallagissiuutit anorisaatit, batteriit generatorilu dieselitortoq atorlugit Igalikumi innaallagiaq kiassarnerlu isumagineqartalissaaq.
Nukissiorfiit tusagasiuutinut nalunaarumminni taama allapput, erseqqissaatigalugulu nukissiuutit assigiinngitsut taakku atornerisigut aalaakkaasumik aningaasanillu atuilluarnerusumik sumiiffiit minnerit innaallagissiorfeqarsinnaasut.
Ajornartoornermi dieselimik pilersorneqartassapput
Pilersaarut imaappoq, Igaliku aasaanerani seqernup anorillu nukinganit innaallagissamik pilersorneqartassasoq. Seqernup anorillu nukinganit nukissiorneq aalaakkaanngimmat nukissiorfik aamma battereqassaaq, taamaalillunilu ulloq unnuarlu pilersuineq assigiimmik pissaaq.
Generatori dieselitortoq maanna Igalikumi atorneqartoq seqernup anorillu nukinganik ajornartoornermi pilersuisassaaq, naatsortuutigineqarporli aasakkut generatori dieselitortoq atorneqartassanngitsoq, Nukissiorfiit taama nalunaarput.
Anori dieselilu ukiukkut
Ukiukkut, ullut naalippata, seqernup kissaanit nukiliuutit nukissiorpiarunnaasapput. Sulili anorimit nukiliuutit atorneqarsinnaassallutik, taakkulu generatorilu dieselitortoq marluutillugit nunaqarfimmut innaallagissamik kiassarnermillu pilersuissapput.
Aamma atuaruk Nunarput avatangiisimik mianerinninnerulissaaq
Batteriit ullup ingerlanerani immerneqartassasut pilersaarutaavoq, unnuakkullu nunaqarfik batteriniit innaallagissamik kiassarnermillu pilersorneqartassasoq pilersaarutaalluni.
Taamaaliornikkut dieselimik sipaartoqartassaaq generatorimillu sivisunermik atasinnaanngortitsilluni, Nukissiorfiit nalunaarput.
Nukissiorfiit neriuutigaat innaallagissiorfik aggustimi 2016-imi atulerneqarsinnaassasoq. Misiliinerlu iluatsissappat allani taamaattumik aamma misiliisoqassaaq siunissamilu immaqa tamani innaallagissiorfiit taama ingerlalersinnaassallutik.
