Seqernup anitserujussuarnera NASAp aarlerisaarutigaa
Innaallagissamik pilersuineq raatiukkullu attaveqaatit ulluni qaninnerni eqqorneqarsinnaassapput.
Amerikamiut avataarsualiartitsisarfiat NASA taama aarlerisaarivoq.
Seqernup kujasinnerusortaata qaavani anitserujussuartoqartoq, NASA-p avataarsualiartitaata Solar Dynamics [darj'namiks] Observatoryp unnuaq uppernarsivaa.
Kortbølgekkut attaveqaatit Kinamiittut seqernup qaavata anitserujussuarneranit akornusersorneqareerput, qaammataasatigullu attaveqaatit aqagu tallimanngornermi immaqalu aamma arfininngornermi akornusersorneqarumaartut ilimasaarutigineqarluni.
Seqernup qaavanit taama sakkortutigisumik qangali anitsisoqarami maanna aatsaat anitsisoqaqqippoq.
Seqernup qaavani anitsiffik ulloriarsuartut Jupiteritut angitigaaq, anitsinerup 19 millionit gradit tikillugit kissassuseqarsimanissaa eqqoriarneqarpoq.
Seqernup anorersuaanik taaneqartartup qinngorneri sekundimut 900 kilometerinik sukkatigalutik Nunarsuatta tungaanut maanna ingerlaarput, arsarneqarnerunissaalu ilimagineqarsinnaavoq.