Silaannaap kissatsikkiartornerata qanoq iliorneqarsinnaanera nunarsuarmi tamani eqqartorneqartualerpoq.
Isumassarsiallu kingulliit ilaat Superman-imik titartakkaneersuugunavippoq.
Maanna amerikamiut ilisimatuuinit siunnersuutigineqarpoq, raketti avataarsualiarteriarlugu nunat issittut qulaannut silaannarsuarmut sananeqaateeqqanik mikisuaraararsuarnik taamannarpassuarnik siammartiterisinneqarsinnaasoq. Seqerngup qinngornerata sermersuarmut aatsitsinera taamaalilluni unikaallatsinneqarsinnaassaaq.
Sananeqaateerarpassuit isarussanut seqinersiutinullusooq assersuunneqarsinnaapput.
Isumassarsiaq tamanna avataarsualerisunit NASA-mit kiisalu Stanfordip Universitetiani ilisimatuunit pimoorulluinnarlugu uani sapaatip-akunnerata naanerani oqallisigineqarsimaqisoq, aviisip The Boston Globe-p allaaseraa.
Periuseriniarneqartoq tuluttut taaguuteqartinneqarpoq: ”geo-engineering”, - tassagooq teknologi ikiorsiullugu nunarsuup silaannaa taamaalillugu iisartakkerlugulusooq qajassuunneqarsinnaalissagaluarpoq.
Silaannaq pillugu ilisimatuut ilaat, Ken Caldeira, aviisimut Boston Globe-mut unnersiorsimavoq, qarasaasiaq atorlugu naatsorsuinertik naapertorlugu isumassarsiaq atorsinnaalluartuusoq.
- Paasivarpummi seqerngup qinngornera 20 procentimik asserutsigu, taava issittumi nunat imartai sikuneqqissinnaassasut.
Sananeqaateerarpassuillu tamakku siammerterneqareernermik kingorna nunamut nakkaalerpata qanoq kinguneqartitsisinnaanerat ilisimatuunit akissuteqarfigineqanngilluinnarsimavoq.