Seqerngup kissaanit kiassaateeqqat ulamertut

Sisimiuni inissisimasut Nunatsinni Nutaaliorfik Issittumilu Teknikkikkut Ineriartortitsivik, Artek, suleqatigiillutik seqerngup kissaa iluaqutigalugu nukissiorfeeqqanik ulamertunik katitertarissanik atuarfinni, suliffeqarfissuarni angerlarsimaffinnilu atorneqarsinnaasunik misileraasimapput.

Ukiaq manna misiliutaasoq siulleq suliarineqarsimasoq, Professori Artekimilu pisortaq Arne Willumsen oqarpoq.

-Seqerngup kissaanik tigooraasoq ulamertoq, ruujoorersuartut imaluunniit puiaasarsuartut ilusilik, siunissami akilersinnaasumik atorluarneqarsinnaanersoq misilerassallugu periarfissinneqarsimavugut, Arne Willumsen nassuiaavoq.

Paasineqarpoq ilumut akilersinnaasoq, taamaattumik qaammatini tulliuttuni tassunga ulamertumut attaviusussamik saattukujuunik sanaartortoqalissaaq Sisimiuni Amutsivikup qalianut kujammut sammisuaniittussanik.

Arne Willumsen aperineqarami taakkua kikkunnit aamma atorneqarsinnaanersut, nassuiaalluni oqarpoq, taakku seqerngup qinngorneranik katersisussat ima nutaaliaatigalutik pitsaatigisut, ulamertuugamik sumulluunniit sammigaluarunik seqerngup kissaanik katersisinnaallutik allaat. Assersuutigalugu seqerngup kaaviinnarfiata nalaani seqineq avannaa tungaaniittarpoq, tassalu sattukujuut kujammut sammisut kissamik katersisussat sunnguamik iluaquserneqarsinnaanngillat, ukuli ulamertuugamik meterip affaata missaanik portussusillit sumulluuniit sammigaluarumik seqinermik saqqarneqartuartussaagamik katersiuarsinnaapput, tassami avannarpariartortilluta piffissap ilarujussuani seqineq avannarpasissumiittarmat.

Taava taakku ulamertut kissamik katersisut katitertagaasussaapput qaleriiaat, qaleriiaarnerilu malillugit soorunami amerlappata kissaq annerusoq ikinneruppatalu kissaq minnerusoq katersorneqarsinnaavoq. Amerlasuut atuarfinni suliffeqarfinniluunniit angisuuni atorneqarsinnaapput.

-Taavalu qaleriiaat ikinnerit inuit angerlarsimaffiinik kiassaalluarsinnaallutik.

EU, Namminersornerullutik Oqartussat, Nunatsinni Danmarkimilu aningaasaateqarfiit suliamut aningaasaliisimapput.