Semifinalemi inissat imatut aaqqinneqassapput
K-33 Kâgssagssummut ajugaassagaluarpat aammalu T-41 Nagtoralimmut ajugaalluni taava pulje 2-mi holdit tallimaasut tamarmik arfinilinnik pointeqaleriaannaapput.
GBUp unammersuarnermut ataatsimiititaliaani siulittaasoq Gert Fleischer KNR-ip qinnuigaa nassuiallatsiaqullugu taamatut pisoqariataassagaluarpat qanoq aalajangertoqassanersoq.
- GBU-mi ataatsimeersuarnermi ukiormanna aalajangerneqarpoq holdit arlallit pointeqatigiissappata isertitsinerit siulliullugit najoqqutarineqassasut. Taava arlallit isertitsinikkut naligiissagaluarpata imminnut unammisimanerat aatsaat aalajangiisuutinneqassaaq, Gert Fleischer taama nassuiaavoq.
Målit ikittuararsuit taamaallaat pulje 2-mi nikingassutaapput. Taamaattoq SAK isertitsinikkut inissisimalluarnersaagallarpoq plus 3-qarami. Kâgssagssuk ippassaq T-41-mut ajugaangaluarluni pulje-mi isertitsinikkut kinguartuuvoq minus 4-qqalluni. (takussutissiat takuuk).
Kikkut semifinale-rtussat aatsaat aalajangerneqassaaq unammineq kingulleq unnugu naammassippat. B-67-ip naligiiginnarnissaq naammagisinnaavaa semifinalemut anngutissaguni.
- Kisianni tassa Kugsak 45 aamma G-44 pinngitsooratik ajugaasariaqarput semifinalemut anngutissagunik, Gert Fleischer nassuiaavoq.
Aajuna pulje 1-mi inissinnerat:
| 1. B-67 | 3 unamminerit | isertitat11-1 | 7 point |
| 2. Kugsak 45 | 3 unamminerit | isertitat 9-3 | 5 point |
| 3. G-44 | 3 unamminerit | isertitat 4-0 | 5 point |
| 4. FC Malamuk | 4 unamminerit | isertitat 5-16 | 3 point |
| 5. Eqaluk 56 | 3 unamminerit | isertitat 3-12 | 1 point |
Aajuna pulje 2-mi inissinnerat:
| 1. SAK | 4 unamminerit | isertitat 11-8 | 6 point |
| 2. Nagtoralik | 3 unamminerit | isertitat 3-2 | 6 point |
| 3. Kâgssagssuk | 3 unamminerit | isertitat 5-9 | 6 point |
| 4. K-33 | 3 unamminerit | isertitat 4-3 | 3 point |
| 5. T-41 | 3 unamminerit | isertitat 6-7 | 3 point |
Aajuku sisamanngornermi unamminissat
Nal. 13.00 B-67 - Kugsak 45 (tv-mi radiomilu toqqaannartumik)
Nal. 15.00 K-33 - Kâgssagssuk (tv-mi radiomilu toqqaannartumik)
Nal. 17.00 G-44 - Eqaluk 56
Nal. 19.00 Nagtoralik - T-41
