Semifinale siulleq nalunaaqutaq ataatsimut aallartilerpoq
Siorna pissartanngortut B-67 T-41-mut unammissapput.
T-41 pulje 2-mi inissisimavoq, pulje 2-milu unammeqattaarnerit naammassineqarmata holdit tallimat tamarmik naligiillutik 6 pointeqarput.
Isertitsinerpaajusullu taamaasillutik semifinalimut ingerlaqqittussanngorput.
Arsaattullu unammineranni paasinarsivoq T-41 S.A.K.-lu assigiimmik isertitsillutillu isertitsiffigineqarsimasut.
Taava taamaalisoqaraangat susoqartarpa?
Pissartanngorniunnernik aaqqissuisut S.A.K.-p siulittaasua Fali Kleist ullaaq oqaloqatigigatsigu ima tamanna pillugu ima oqarpoq:
- Siulianiilli aalajangiutereeratsigu ataatsimiititaliaq, arlaannik nangaasoqartillugu sulisartussaq. Taassuma aalajangersimavaa, paaseriarlugu qanoq pisoqartoq. Makitsinissaq sulissutigivarput, piffissap sivikitsup ingerlanerini. Taamaalineranilu inuppassuit arsaattarfiup qeqqani uninnngapput tusarsiillutik qanoq pisoqarniarnersoq, tassa nalugamikku kikkut anngunnersut. Taamaattoqartillugulu tassa makitsineq pisussaamat, piareersariarlugu arsaaffiup qeqqanut periarluta maani illoqarfitsinni Radiokkut malinnaavigineqarluta, inuppassuit uppernarsaasoralugit makitsineq ingerlatinneqarpoq, tassanilu T-41 makitaalluni, Fali Kleist oqarpoq.
Taamatut pisoqareersorlu inuit qanoq qisuariarsimarsut Fali aperineqarami ima akivoq:
- Tassami inuit ilai soorunami immaqa pakatsipput maani SAk makitaanngitsoormat, Sisimiormiullu isiginnaartuullutik. Kisianni T-41-mik nilliallutillu, pissigarlutillu. Inuppassuit ilai aamma nilliapput. Eqqumiillunilu aamma pissanganarpoq, tassa inuppassuit isiginnaarput makitsisoqalermat. GBU-minngaanniillu aallartitaq makitsisuuvoq, uangalu makitsiffissaq taanna paaralugu. Misigisaq eqqumiippoq, kisianni tassa pissanganartorujussuuvoq, Fali Kleist taama oqarpoq.
Isikkamik arsaalluni pissartanngorniunnerni aaqqissueqataasoq Fali Kleist taama oqarpoq.
Semifinalit tassuugu nalunaaqutaq ataatsimut aallartissapput, B-67 T-41-mut unammissammat, ualerulu nalunaaqutaq pingasunut unammissapput G-44 - K-33.
Aqagu ualikkut nalunaaqutaq sisamanut finalertoqassaaq, siornalu normu 3-nngorniuttoqassalluni. Tamannarpiaq pissutigalugu aqagu ualikkut Radioaviisit siuartinneqarnikuupput, pingasunut aallartinnatik, marluk qaangerlugit tanneq pingasunut, tassa 14.15 kalaallisut Radioaviiseqassammat, marlullu qaangerlugit tanneq sisamanut, 14.20 qallunaatut Radioaviiseqassalluni.
