Seeqqumikkut suliaritinniarlutik utaqqisut ukiumut 30-nik amerleriartassapput
Demokraatiniit inatsisartunut ilaasortap, Jørgen-Ole Nyboe Nielsenip apeqqutaanut Ilaqutariinnermut Peqqissutsimullu Naalakkersuisup, Naja Petersenip akissutaani paasissutissat nikalluallannartut atuarneqarsinnaapput. Seeqquluttut assersuutigeqqeriarutsigit ukioq manna novembarip qaammataani seeqqumikkut suliaritinniarlutik utaqqisut 201-iupput. Naalakkersuisunullu ilaasortap naliliinera naapertorlugu aningaasaliissutit allanngortinneqanngippata, seeqqumikkut suliaritinniarlutik utaqqisut ukiumut 30-nik amerleriartassapput. Siffialertinniarlutik utaqqisut ullumikkut ukiuni marlunni pingasuniluunniit utaqqisariaqartarput. Novembarillu qaammataani taakkua utaqqisut 44-pput.
Siffissamikkullu suliaritinniarlutik utaqqisut ukiup ataatsip ingerlanerani amerlerialaartassasut, Naalakkersuisunut ilaasortap Naja Petersenip naatsorsuutiginerarpaa. Seeqqumikkut siffissamikkullu suliaritinniartut passunneqarnissaasa sukumiisumik pilersaarusiorlugu suliarineqarnissaa ullumikkut aningaasaliisarneq atuutsillugu akissaqartinneqanngitsoq aamma Naja Petersen oqarpoq. Naammattunik peqqissaasunik sulisoqalerpat aatsaat pilattaanissat pilersaarutigisat nangeqqinneqaqqissinnaasasut, tamannalu immaqa 2009-mi januaarip naalernerani anguneqarsinnaassasoq, Ilaqutariinnermut Peqqissutsimullu Naalakkersuisoq, Naja Petersen oqarpoq.
Siornatigut Ilaqutariinnermut Peqqissutsimullu Naalakkersuisoq, Arkalo Abelsen, ilaatigut Dronning Ingridip napparsimmavissuani sulisussaaleqineq pissutigalugu novembarip qaammataani tunuarpoq.
