Savissivimmi Pilersuisup nioqqutissaqartinniarnera erloqinartoq
- Nioqqutissanik assartuiniarnermik aaqqissuussineq avannaani sikorsuaqartuarnera pissutigalugu ajornakusoortarpoq, ukiumullu marloriaannaq umiarsuaq pajuttarpoq, Pilersuisumi pisortaq Lars Behrend oqarpoq. Pajuttaat kingulleq tikikkaangami nioqqutissanik qaammatinut qulinut aqqanilinnulluunniit naammattussanik usisarpoq.
Savissivimmi pisiniarfiup nioqqutissaarunnera Pilersuisumi niuertumit tusarneqarmat qulimiguulik nioqqutissanik qerisunik Qaanaamiit Savissivimmut erngertumik assartuisinneqarpoq.
- Sapaatip akunnerata siuliani qerisumininnguit qulimiguullip tikiummagit nuannaarpugut, naak nioqqutissat qerisut akisugaluaqisut ullussaallu qaangiutereersimagaluartut, Savissivimmi atuisoq Qaarngaaq Nielsen radioavisimut ippassaq oqarpoq.
Pilersuisumili pisortamit nioqqutissat akisugineqarnerat paasiuminaatsinneqarpoq, nioqqutissat qerisut allanisuulli akeqarmata ullussaallu qaangiussimagaluartut immikkut akuerineqarlutik nioqqutigineqartarmata ajornerunngimmata, taamaattorli naatitat paarnarsuillu assartorneqarnerat pissutigalugu akisunerusinnaanerarpai.
Savissivimmut pajuttussaq maanna Sisimiunut anngussimasoq aggustip qulingiluaanni Savissivimmut tikissaaq.
