Savimmik kapisisoqarpoq

Paamiuni qatanngutigiit marluk assortuunnerat savimmik kapisinertalik, eqqissiviilliornerit, inuillu aalakkattut, tamakkuupput sineriatsinni politeeqarfiit nalunaarutigisaat.

Angutit qatanngutigiit marluk arfininngormat ullaassakkut arfinernut qiteqqutilersoq assortuutilersimapput, nukarliusorlu timimigut savimmik kapineqarpoq:

- Savimmik kapineqartoq inuunerminik navianartorsiortinneqanngilaq, nunatta vicepolitimesteria Morten Nielsen radioaviisimut oqarpoq, nangilllunilu:

- Savimmik kapisisoq politiinit sapaatit akunnerini sisamani tigummineqarallassaaq, piffissami tassani pisimasoq pillugu annertunerusumik misissuisoqassammat, Morten Nielsen oqarpoq.

Nuummi niviarsiaraq 13-inik ukiulik sisamanngormat unnukkut aqqaninngulersoq angutinit inuusuttunit pingasunit saassunneqarpoq, annersarneqarlunilu.

Saassussineq Atuarfik Samuel Kleinschmidt-ip eqqaani pivoq, niviarsiaqqallu mobiltelefonia tillinneqarpoq. Saassussinermik takunnissimasinnaasut Nuummi politiinut saaffiginneqquneqarput.

Nuummi politiit normoraat 32 14 48.

Kangaatsiami angut imigassartorsimalluni biilertoq illumut aporsimavoq.

- Biilinik aqutsisoq ajoqusinngilaq, annertunerusumillu aseruatitertoqarani, Aasianni politiit taama nalunaaruteqarput.