Saviminissamik piiaanissaq soqutigineqaqaaq

Baffinland Iron Ore aatsitassarsiortitseqatigiiffissuuvoq saviminissamik piiaanermik ingerlatsiviusoq, Qeqertaalummi saviminissaqarferujussuarmi kuussuup Mary Riverip eqqaaniittumi, Iqalunnit 1000 kilometerinik avannarpasinnerusumiittumi aamma Mitsimatalimmit 160 kilometerinik kujasinnerusumiittumi piiaaffiliorusuttoq. Saviminissaqarfik nunap ilaani pukkitsunik qaqqalimmi alianaatsumiippoq, tamaanilu naggueqatigiit Inuit ukiuni hunnorujulikkaani piniartarsimapput. Maannali nunani allamiut saviminissarujussuup tamaaniittup piiarnissaa soqutigisaraat.

Massakkut annerpaamik "neqerooruteqarniuttoqarpoq", kikkut annerpaamik neqerooruteqarsinnaanersut pitsaanerpaamillu atugassaqartitsisinnaanersut paasiniarneqarluni. Nunat tamat aatsitassarsiortitseqatigiiffii angisuut marluk tassaasut Nunavut Iron Canadamiut Amerikamiullu pigisaat aamma ArcelorMittal Luxembourgimeersoq akuersissummik piserusupput. Aatsitassarsiortitseqatigiiffiit taakku marluusut nunap qaavaniittumik saviminissamik piiaaffiliorusupput, nutaamik umiarsualiviliorusullutik, qularnanngitsumik Milne Inlet-ip eqqaaniittussamik, saviminissarlu Ikeq Davis aqqusaarlugu Europamut assartorniarlugu. Ilaatigut oqaluuserineqarpoq sikunik aserorterutit atorlugit saviminissaq ukioq kaajallallugu assartorneqarsinnaassasoq.

Umiarsualiviup nutaap tassungalu atatillugu aqquserniassap saniatigut kuussuup Mary Riverip eqqaani suliareqqiisarfimmik suliffissualiortoqarniarpoq.

Aatsitassarsiortitseqatigiiffiup aappaata saviminissarsiorfissaq 2700 millionit koruunit missaannik naleqarnerarpaa, aappaatalu 2800 millionit koruuninik naleqarnerarlugu.

Baffinland Iron Oremit oqaatigineqarpoq, kikkut saviminissamik piiaasussatut akuerineqarnissaat, sapaatip akunnerani tulliuttumi aalajangiiffigineqartussaasoq.