Saviminissamik piiaaffissaq allannguerujussuassaaq
Saviminissamik piaaffissaq Mary Riverimik taaguuteqartoq, Iqalunnit 1000 kilometerinik ungasitsigisumiippoq. Aatsitassamik piaaneq aallartinneqalerpat sulisussanut illoqarfiliortoqassaaq, aqquserngit nutaat sanaartorneqassapput, timmisartorsuit angisuut miffigisinnaasaannik mittarfiliortoqassaaq umiarsualiviliortoqassallunilu.
Umiarsuit sikusiutaasinnaasut saviminissamik usilersorneqartassapput. Umiarsuit taakkua Qeqertaalummi nalinginnaasumik talittartunit quleriaammik 15-eriaammilluunniit anginerussapput. Umiarsuit taakkua Hollandimi Rotterdamimut ingerlaartassapput, ullorlu allortarlugu aallartarnissaat pilersaarutaavoq.
Pilersaarummi annertuumi allanik aamma sanaartortoqassaaq. Saviminissap piaaffimmiit umiarsualivimmut assartorneqarnissaanut qimuttuitsut aqqutaannik sanasoqassaaq.
Canadap avannarpasinnerusortaani qimuttuitsut aqqutaannik sanaartorneq 10 milliarder koruninik akeqassaaq.
Qimuttuitsut aqqutaat 149 kilometerinik takissuseqassaaq, taannalugooq ukiuni tulliuttuni 21-ni saviminissamik tonsinik millionilinnik arlalinik oqimaatsigisunik ullut tamaasa assartuiffiusassaaq. Qimuttuitsut aqqutissaat uumasorpassuaqarfiuvoq. Tuttorpassuaqarpoq. Aamma nannut, ukallit uumasorpassuillu allat najortagaat qimuttuitsut aqqutissaanniipput.
Umiarsuliaviup avataani arferit, aarrit qilalukkallu ininnaaqarput. Aatsitassarsioqatigiiffik Baffinland Qeqertaalummi innuttaasunik naggueqatigiinnik inunnik 5.400-inik pisortigoortumik tusarniaavoq, tupinnanngitsumillu inuit isumaat assigiinngiiaarput.
Aatsitassarsioqatigiiffik Baffinland, uumasut avatangiisillu annertuumik pingaartinneqarnissaanik qulakkeerinilluni nalunaarpoq, suliniummilu innuttaasut suliffissaqarnissaannik iluaqutissarpassuaqarneraallutik.
Aatsitassarsiorfissualiorniarnermut pilersaarutip unitsinneqarsinnaanera ilimagineqanngilaq, avatangiisinik misissuinerit pilersaarutip ilusilernissaanut annertuumik pingaartuteqarnera pilersaarummut akerliusunut paasitinneqarnissaat pingaartinneqarmat.
