Norgep avannaani Tromsimi savaatillit, qaammatip ataatsip ingerlanerani savaataat nannup allarsuup angutivissap saassussisarnerini, savat ikinnerpaamik 100-t toqunneqareersimapput. Allarsuup saassussisarsimaneri ukiuni kingullerni marlunni pisarsimapput, taamaammat savaatillit piumasaqarput, allarsuup piaarnerpaamik toqunneqarnissaa.
- Savaatima nunamut anisinnissaat kiisa pisinnaajunnaarpoq, tassami allarsuup savaatikka nungoqinammagit, Hans Vatne, Manndalen-imeersoq oqarpoq.
Piniarnermut nakkutilliisoq, Sigmund Dalvik oqarpoq, allarsuup savanik toqoraasup toqunneqarnissaanut akuersisoqartoq, allarsuullu pisariniarneqarnissaa aallartinneqartoq.
Nannulli taama angitigisut qimarrarissuupput, taamaammat pisarineqarsinnaanera nalornissutigineqarpoq.
- Allarsuit ullormut 8 mil-it ingerlasinnaasarpaat, taamaammat tumit nutaanerusut takuneqariarpata, allarsuarmik malersuineq aallartinneqassaaq.