Savap meqquinut nalunaarusiaq: Kina savap meqqueerniarusuppa?

Aalisarnermut, Piniarnermut Nunalerinermullu Naalakkersuisoqarfik nunatsinni savat meqqui pillugit nalunaarusiortitsipput.

Nalunaarusiaq taanna Innovation South Greenlandip inaarsaqqammerpaa.

Nalunaarusiaq taanna nunatsinni savat meqqueernialerusuttunit isumassarsivigineqarlunilu najoqqutarineqarsinnaasoq, Namminersorlutik Oqartussat tusagassiuutinut allapput. Nalunaarusiaq uani atuarsinnaavat.

Nalunaarusiami tassani sammisat ilarpaalui nunatsinni savat meqquinut tunngapput.

Savat meqquinik niueruteqarnerup oqaluttuassartaanut maannamullu killiffianut tunngasut ilaatigut sammineqarput.

Kujataani savat meqqui kissakkat ukiumut 24 tonsit missaanniittartut taakkunanngalu amerlanerpaat iginneqarlutillu ikuallanneqartartut, maannamut erserpoq.

Taamaammat savat meqquinik tonserpaalunnik atorluaanissamut periarfissaqarpoq.

Millionilikkaanik aningaasaliiffigineqartariaqarlunilu misilerarneqartariaqartoq

- Nalunaarusiap siunertaraa misissussallugu aamma nassuiaatigissallugu niuernerpalaartumik periarfissatut takorluukkat aamma savat meqquisa tunisassiarinissaasa ingerlaasii nassuiaassutigissallugu, najukkani savat meqquinik tunisassiorfimmik pilersitsissagaanni, Namminersorlutik Oqartussat tusagaassiuutinut allapput.

Nunatsinni savat meqquinik tunisassiorfiliorniaraanni 1,5-4 millionit koruunit missaanik aningaasaliiffigineqarnissaq pisariaqartoq, nalunaarusiami inerniliunneqarpoq. Nunatsinnili savap meqquinik qanoq tunisassiortoqartiginiarnersoq apeqqutaaginnartoq, nalunaarusiami allaqqavoq.

Aningaasalli iluatsitsilluarnissamut qulakkeerutaasutuaannaasinnaanngillat. Savammi meqquinik passussinermik tunisassiornermillu ilisimasaqarfigileqqaartariaqarput. Tassa misilittagaqarfigisariaqarlutillu misilerarneqaqqaartariaqarput.

Aalajaatsunillu sulisoqarnissaq aamma pingaaruteqartoq, nalunaarusiami erseqqissarneqarpoq.

- Tamakkua aqussinnaagaanni tunisassiassallu eqqortut ineriikkatut tuniniarlugit, pitsaassuseq eqqortoq atorlugu, taava najukkami tunisassianik naleqarluartunik peqalersimassaagut.

- Nioqqutissat taamaattut nunap iluani tunineqarsinnaapput, minnerunngitsumik takornariat amerlatsikkiartuinnartut iluanaarutiginiaraanni.