Savanik toqoraavik akisuallaarsoraat

Demokraatit maanna naalakkersuisunut kajumissaarutigaat kujataani savaatillit savaatiminnik ukiumoortumik toqoraasarnerannut tunngatillugu pitsaasumik aaqqiissuteqaqqullugit.

Neqilerivik Neqi A/S ullutsinnut naleqqutinngilaq ingerlanneralu assut akisoqaaq, taama demokraatit isumaqarput.

Demokraatit erseqqissaatigaat Neqi A/S-imiit piumasarineqarsimasoq savanik toqoraaneq ukiumut ingerlalluassappat 4 mio. koruuninik pisariaqartitsillutik.

Taamaattumillu tamanna tunngavigalugu demokraatit isumaqarput ukiumoortumik savanik toqoraasarneq pillugu sivisuumik atasinnaalluartumik naalakkersuisut aaqqiissuteqartariaqalersut.

Taamatuttaaq demokraatiniit savaatillit kajumissaarneqarput ikioqatigeeqqullugit taamaalillutillu piginneqatigiissutigisaminnik savanik toqoraaneq namminneq ingerlatilersinnaammassuk.

Taakkuttaaq tikkuussipput Narsami savanik toqoraavissamik nutaamik sanatitseqqullugit, imaluunniit savaateqarfinni savanik toqoraaveeqqanik pilersitseqqullugit.