Savalimmiut nutaanik naalakkersuisortaassapput
Partiinit illuatungiliuttunit 18-it Lagtingimut qinigaapput. Lagtingimi ilaasortat 33-usarput.
Aalisarnermut aaqqissuusseqqinnermik naammaginninngitsoqarnera ajorsarnermut pissutaanerpaajusoq Socialdemokraatineersoq Aksel V. Johannesen isumaqarpoq.
Amerlanerussuteqalaartut aalisarnermi aaqqissuusseqqinermik 2017-imi akuersissuteqarput. Aaqqissuusseqqinneq taanna pissutaalluni oqartussat aalisagartassiissutit 15 procentii akitsorterussinermi ullumi tuniniartarpaat.
Taama aalajangerneq aalisarnermik suliaqartunit illuatungiliuttuniillu talerperliusunit nilliaatigineqarpoq, ingammillu Savalimmiut avannarpasissortaanni qeqertani ajorineqarlutik.
Partii qanganisalerisoq Folkeflokkeni ukiuni sisamani illuatungiliuttoq qinersinermi siuariarnerpaajuvoq. Savalimmiormiut 25 procentingajaat partiimik taassuminnga marlunnik amerlanernik qinigaatitaqalersumik qinersipput.
Folkeflokkenip siulittaasua 50-inik ukiulik Jørgen Niclasen partiimit qinersinermi siuariartut aappaannit talerperliusumit Sambandspartiimit Lagtingimilu partiiniit minnerusunit suleqataaffigineqartumik naalakkersuisoqatigiinnik pilersitsinialerpoq.
