Savalimmiut: Jenis av Ranamut tatiginninnginnermik taasisoqarniartoq

Folketingimut qinersineq marlunngornermi naammassippat – savalimmiunilu lagtingi sulileqqippat – savalimmiuni partii Tjóðveldi Jenis av Ranamut partiimit Miðflokkurinimeersumut tatiginnikkunnaarnermik taasititsiniarpoq.

Savalimmiuni nutaarsiassaqartitsivik, Fonyhedsbureau taama allaaserisaqarpoq.

Illuatungiliuttut ataatsimoortut naalakkersuisoqatigiinniillu ataatsip kultureqarnermut nunanullu allanut tunngasunut ministeri, Jenis av Rana uppisinnissaa piareersimaffigaat.

Lagtingimut ilaasortap raadiokkut oktobarip 25-anni aallakaatinneqartumi oqaaseqarnera pissutigalugu tatiginnikkunnaarnermik taasititsisoqarniarpoq.

Radiokkut aallakaatitamik tusarnaartup ministerip suiaaqatiminoortumik ministeriuneqarnissaa tapersersorneraa paaserusuppaa. Apeqqut taanna radiokkut aallakaatitsisup, De Konservativep siulittaasuanut Søren Pape Poulsenimut tunngasoraa.

- Naagga, Søren Pape Poulsen toqqarnavianngilara. Suiaqatiminoortutut inuuneqarneq uanga nammineq tunngaviusumik isummannut assortuuppoq, partii sinniisuuffigisara tunngaviusumik aamma taama isumaqarpoq, Savalimmiullu tunngaviusumik aamma taama isumaqarpoq, Jenis av Rana Savalimmiuni raatiumut oqarpoq.

AAMMA ATUARUK Suiaqaatiminoortumik ministeriuneqarnissamut naagga

Tamatuma kingorna Jenis av Ranap De Konservativet siulittaasuannut tunngannginnerarpaa, tamannalu partiimi Miðflokkurinimi siulittaasutut ministerituunngitsorlu oqaaseqarfigalugu oqaatigalugu.

Partii Tjóðveldi illuatungiliuttut partiivinit allanit marlunnit tassa Framsóknimit aamma Javnaðarflokkurinimit taperserneqarpoq, taakku Jenis av Ranap oqaaseqaataa aamma isornartorsiorpaat.

Partiit marluk tapersiineratigut lagtingimi ilaasortanit 33-nit 16-it tatiginnikkunnaarnermik taasiniarput. Taamaalillutik amerlanerussuteqarnissamut ataatsimik amigaateqarlutik.

Lagmandip aamma partiip Sambandsflokkurinip siulittaasuata, Bárður á Steig Nielsenip oqaaseqaatigineqartut isumaqatiginagit aamma Jenis av Rana uparuarsimallugu oqaatigaa.

Tamannalu kinguneqartitsissutaassanersoq lagtingimi qaqinneqartussaanera pissutigalugu, Savalimmiuni radiukkut tv-kkullu aallakaatitsivimmut, Kringvarp Føroyamut oqaatiginianngilaa.

Aammattaaq taassuma partiiata tatiginnikkunnaarnermik taasititsisoqarniarnera qanoq aalajangiiffiginiarnerlugu aalajangersimanngikkaa oqaatigaa.