Savalimmiut Islandillu akornanni immakkut kabeliliinialerput

Savalimmiut Islandillu akornanni innaallagissamut aqqummik kabelersuarmik imaatigut ikkussinissaq akilersinnaanersoq nunat taakku marluk misissuiffigilerpaat. Savalimmiuni ingerlaavartumik nukissiuuteqalernissaq tassani eqqarsaataavoq.

Maannamut nalilersuinerit paasinarsisippaat taama kabeliliinissaq teknikkikkut akornutissaqanngitsoq, naliliinerillu aamma takutillugu, immap nukinga atorlugu Islandimi nukissiuutinit Savalimmiut aamma pilersorneqarsinnaalluartut – taamaalillutik uuliamit nukissiuuteqarluni ingerlatsineq savalimmiormiut taamaatissinnaalissavaat.

- Anguniagarput annertoqaaq akisoqalunilu, tamannali piffissap ingerlanerani akilersinnaalissasoq naatsorsuutigaarput. Pilersaarutit pissanganartuupput, nukissiuuteqarnermut Savalimmiuni naalakkersuisoq, Bjarni Djurholm, oqarpoq.

Pilersaarut koruuninik milliardinik arlalinnik akeqarpoq, piviusunngussappallu naatsorsuutaavoq, Savalimmiuni suliffissuit kisimik pinnatik, aammali savalimmiormiut inoqutigiit, Islandimiit kabelersuit atorlugit nukissiuutinik pilersorneqalissasut.