Savalimmiut illersorlugit Danmark akerlilissavarput

Aalisarnermut naalakkersuisup Karl Lyberthip Nunarput Atlantikup Avannaani Island Savalimmiullu peqatigalugit EU-mut, Norgemut qallunaallu aalisartuinut aalisagalerngusaaannermut ilanngutsippaa. Sermitsiaq ullumi taama allaaserisaqarpoq.
Allattoq Mads Lynge
aggustip 23-at 2013 09:45

Avaleraasartuunik ammassassuarnillu aalisarsinnaatitaanerit matumani pineqarput.

Atlantikup Avannaani sineriaqartutut Kalaallit Nunaata aamma isigineqarnissaa, Aalisarnermut Naalakkersuisup Karl Lyberthip oqaatigaa, kalaallit Atlantikup Avannaani aalisarneq pillugu savalimmiormiut Islandimiullu qanimut tassani suleqatigalugit.

Kalaallit avaleraasartuunik misileraallutik ukiuni pingasuni aalisarsimapput, pisassallu ukiut tamaasa amerliartortinneqartarsimapput, pisassat ukioq manna 55.000-it tonsinngorsimallutik.

Ammassassuarnik misileraalluni aalisarnermi pisassat ukioq manna 10.000-it tonsiupput.

Avaleraasartuunik misileraalluni aalisarnerit ukiuni arlalinni suli ingerlasinnaasut, Karl Lyberthip oqaatigaa.

- Eqqarsaatigaaralu periarfissaq tamanna atorluassagipput qanoq annertutigisumik aalisagartassaqarsinnaanitta ilisimanerulernissaata tungaanut, Karl Lyberthh Sermitsiamut oqarpoq.

Kalaallit avaleraasartuunik Islandimut siusinnerusukkut tulaassisinnaanngillat, maannali tamanna periarfissaalersimalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq