Savalimmiut aningaasaqarnikkut ajornartorsiorput

Savalimmiuni aalisakkanik tunisassiorfiit annersaat Kosin, illoqarfimmi Klaksvigimiittoq, ippassaq akiliisinnaajunnaarpoq. Sulisut 200-t missaanniittut suliunnaarput, akiliisinnaajunnaarnerlu tamanna illoqarfimmut 5.000-nik inulimmut ajornartorsiutinik nassataqartussanngorpoq.
Allattoq Louise M. Kleemann
decembarip 18-at 2008 06:52

Aalisariutit arfinillit Kosinimut tunisassiortuugaluit qanittukkut akiliisinnaajunnaarmata, akitsorterussinikkut tunineqarput.

Savalimmiut taamaalillutik aamma nunarsuarmi aningaasarliornermit malunnaatilimmik eqqorneqarput.

Klaskvigip kommunea aningaasatigut ajornartorsiungaatsiarpoq. Illoqarfik akiliisinnaasuseqanngilaq, kommunimilu sulisut suliffimminnit soraartariaqarsimallutik.

Torshavnip eqqaani sanaartornissamik pilersaarut ippassaq saqqummiunneqartoq, aningaasaatilissuup Jákup á Dul-imit pilersaarutigineqaraluartoq aamma piviusunngorsinnaajunnaarpoq, ukiunilu sisamani kinguartinneqarluni.

Nunarsuarmi aningaasarliorneq pisortat suliffeqarfiinut, soorlu savalimmiut radioanut, TV-anullu aamma sunniuppoq, sulisummi arfineq pingasut aamma soraarsinneqarmata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq